Vullismonster bekruip die inwoners van Maraiskamp
'n Reusevullishoop wat daagliks groei het inwoners van Maraiskamp rasend van bekommernis. Die onwettige stortingsarea in Kloofstraat is so groot, dit verswelg die hele straathoek.
Die situasie wek kommer by die gemeenskap, veral in die lig van Covid-19. Volgens 'n inwoner is daar nie 'n stortbak (skip) in die woonbuurt waarin inwoners hul vullis kan gooi nie. Dawid Kamfer, nasionale woordvoerder van Icosa, is verlede Vrydag tydens 'n besoek aan Maraiskamp van die situasie verwittig. Hy het dit sterk veroordeel en gevra vir spoedige optrede.
Munisipale direkteur van gemeenskapsdienste, Walter Hendricks, het by navraag gesê onwettige stortings moet by die munisipaliteit by 044 802 2900 aangemeld word.
"Die stortings word volgens 'n klagtelys twee keer per week hanteer," het hy gesê.
Die plekke wat geïdentifiseer word, word op die skoonmaaklys geplaas."
Volgens Hendricks is die department in die proses om stortbakke aan te koop. "Dit behoort in die nuwe finansiële jaar (2020 - 2021) gelewer te word, vir plasing in probleemareas," het Hendricks gesê.
Borcherds-pompstasie
Tydens 'n brand laataand verlede Donderdag by die pompstasie in Borcherds het die sekuriteitshokkie afgebrand.
Volgens Athane Scholtz, mediaskakelbeampte van Georgemunisipaliteit, is bewerings dat munisipale werkers hierby betrokke was, ongegronde bespiegeling.
"Die oorsaak van die brand word ondersoek. Die munisipaliteit versoek dat enige persoon wat oor enige inligting in hierdie verband beskik, dit asseblief dadelik aan die polisie sal aanmeld," het sy gesê.