Vertroue geskend op ergste vlak
Twee skokkende voorvalle van beweerde kinderverkragting in George word deur die polisie ondersoek.
In beide die gevalle is die aangeklaagdes persone baie na aan die slagoffers, wat veronderstel was om die kinders te koester en hulle belange op die hart te dra.
Oupa aangekla vir verkragting van kleinkind (3)
‘n Oupa (61) van Denneoord sal weer op 13 Augustus in die George-landdroshof verskyn vir die beweerde verkragting van sy driejarige kleindogter.
Volgens ‘n Suid-Kaapse polisiewoordvoerder, sers. Chris Spies, het die kleuter haar ma van die voorval vertel nadat sy op 23 Mei by haar ouma en oupa gekuier het. “Die eenheid vir gesinsgeweld, kinderbeskerming en seksuele misdrywe in George (GKS) ondersoek ‘n saak van verkragting.
Die verdagte het op 10 Junie in die Georgelanddroshof verskyn waar hy op borgtog van R1 000 vrygelaat is.”
Die saak is tot Augustus vir verdere ondersoek uitgestel.
Familievriend verkrag na bewering dogtertjie (8)
Die man (63) wat in Maart vanjaar in hegtenis geneem is nadat hy na bewering ‘n agtjarige meisie by haar huis in Andersonville, Pacaltsdorp, verkrag het, is op Maandag 27 Mei op borgtog van R1 000 vrygelaat.
Hy moet op 24 Julie weer in die hof verskyn.
Die slagoffer se pa het gesê die verdagte was ‘n familievriend wat hulle gereeld besoek het.
Volgens hom het ‘n ander familielid, wat hulle uit Mosselbaai besoek het, die verdagte na middagete op
Sondag 1 Maart saam met die slagoffer in die badkamer buite die huis betrap.
Die gesin het die polisie gebel en die verdagte is in hegtenis geneem.