Stortingsterrein steeds ’n gevaarlike terrein
Beloofde opskerping van veiligheid by die George-stortingsterrein realiseer nie. Volgens 'n werknemer van 'n plaaslike varsproduktewinkel is gereelde besoeke aan die vullisterrein deel van sy pligte - en dis 'n nagmerrie. "Ek ry groente en vrugte aan wat verval het en elke keer wanneer ek daar inry, storm groot groepe mense op die vragmotor af. Hulle spring op, party nog voor ek tot stilstand gekom het," sê Edmond van den Berg. "Die mense is sonder maskers, so wat help dit dat die veiligheidswagte by die hek besoekers aan virusprotokolle onderwerp, maar hierdie mense mag rondbeweeg sonder om hulle daaraan te steur. Waarvoor is die veiligheispersoneel daar? Hulle kom 'n mens nie te hulp nie. Dis totaal onaanvaarbaar. "
George Herald het al male sonder tal oor die jare berig oor aanvalle op besoekers aan die stortingsterrein.
Joernalis Kristy Kolberg het in Februarie vanjaar geskryf oor 'n vrou en haar tuinier wat aangeval is terwyl hulle skrootmetaal afgelaai het. Haar bakkie is in die voorval beskadig nadat 'n groep mans dit met stokke geslaan en met klippe gegooi het.
Toe het die munisipaliteit belowe dat veiligheidsmaatreëls opgeskerp sou word.
Soos Van den Berg, het die vrou ook ervaar dat die veiligheidsbeamptes nie 'n vinger lig om te help nie. In reaksie op Van den Berg se klagte het George-munisipaliteit se direkteur van gemeenskapdienste, Walter Hendricks, gesê die kwessie is onder die bestuur van die sekuriteitsmaatskappy se aandag gebring. "Hulle het onderneem om hul wagte te versoek om meer paraat te wees. Die feit dat die betrokke voertuig kos op die trok het en dat desperate, honger mense moeilik gestuit gaan word, bemoeilik ongelukkig die situasie."
Oor die gesondheidsprotokolle het hy gesê, "Koronavirus word slegs deur die oë, neus en mond versprei en is onwaarskynlik om te versprei as mense agter op 'n trok spring en die persoon in die voertuig bly." Hy het aanbeveel dat mense na 'n besoek hulle voertuig was.
Die bestuurder van die sekuriteitsmaatskappy LVDS, wat die sekuriteitsdienste verskaf, sê hulle is veronderstel om slegs toegangsbeheer toe te pas by die hek van die terrein. Die wagte probeer gereeld om mense te