Groot gholfvreugde heers in George
“Man, woorde kan nie nou vir jou beskryf hoe dit voel om weer 'n paar stokke op 'n gholfbaan te swaai nie.” “Hemels. Dit was hemels.” “Ons is bevoorreg. Nee, ons is geseënd.” “Fantasties. Lekkerder as lekker.” “Ek was só bly om weer my gholfpêlle op die baan te sien dat ek hulle amper wou soengroet.” Dít was maar enkele van die opmerkings van amateurgholfspelers nadat gholfbane na maande se inperking weer oopgemaak het. Blydskap, groot opgewondenheid en baldadige vreugde het Saterdag in George geheers toe uitgehongerde gholfspelers weer kon terugkeer om hul gunstelingsport te beoefen. Gholf het weer nuwe lewe gekry op Kingswood, George en Glenwood.
Die gholfgees by Glenwood gholfbaan, was aansteeklik. Glenwood is die nuutste baan in die land wat ten volle by GolfRSA geaffilieer is. Alhoewel die baan net oor nege putjies beskik, voldoen dit ná die evaluering vroeër vanjaar aan die internasionale standaarde van 'n volwaardige gholfbaan en bied dit al die voordele aan sy lede.
Glenwood-lede kon nie uitgepraat raak oor die goeie toestand van die baan nie. Dié baan se setperke het nog altyd net lof van spelers en besoekers gekry.
Ian Gibbon, eienaar van Glenwood, was Saterdag 'n verligte, maar diep tevrede, man. "Dit was lekker om die klublede weer in aksie te sien. Ons het baie uitgesien daarna om die baan weer oop te maak, veral noudat ons 'n volwaardige lid van GolfRSA is."
Gibbon sê ten spyte van die inperking van amper drie maande waarin die klub geen inkomste gegenereer het nie, het hy sy personeel van vierstuks met volle betaling behou. "Gelukkig het ons reserwes gehad om op terug te val."
George en Kingswood, albei klubs met 'n personeelkorps van om en by 40 mense, kon danksy goeie beplanning en gesonde finansiële bestuur, ook hul mense met volle betaling behou.
GolfRSA het verlede Vrydag 'n lotery op iTickets.co.za van stapel gestuur waar sportliefhebbers kaartjies kan koop vir
'n kans om groot pryse te wen. Die geld gaan vir 'n hulpfonds om werknemers in die gholfbedryf finansieel te ondersteun
Ek was só bly om weer my gholfpêlle op die baan te sien dat ek hulle amper wou soengroet.
wat hul werk verloor het. Die groot prys is ongetwyfeld 'n dag op Fancourt se fenomenale Links-baan saam met Ernie Els, 'n viermalige Major-wenner. Vir die voorreg om saam met die Big Easy te speel, is slegs 350 kaartjies beskikbaar gestel.
Ons beoog om aanstaande week nog aksiefoto's van die gholf by Glenwood te publiseer.