Bobbejane pla weer
Inwoners van Blanco, wat naby die Malgasrivier woon, kla dat die steurnis van 'n lastige bobbejaantrop deesdae een te veel word.
Volgens een inwoner, Hansie Williams, word hulle vrugtebome en groentetuine op die oomblik geplunder. Die kese word nie maklik afgeskrik nie.
"Ons probeer om die betrokke amptenaar van die munisipaliteit hier te kry, maar hulle reageer nie. Ons weet nie meer wat om te doen nie."
Die Georgemunisipaliteit het by navraag gesê hulle het veral oor die afgelope twee weke 'n toename in bobbejaanklagtes vanuit woonbuurte naby aan die bos soos Denneoord, Groenkloof, Eden, Kraaibosch-landgoed en Wilderness ontvang. Dit is ten spyte daarvan dat winter, wanneer kos in die veld skaars is, gewoonlik as bobbejaanseisoen beskou word.
"Dit is egter al waargeneem dat wanneer 'n trop of enkele bobbejaan voorheen kos in 'n gebied gevind het, hulle aanhou terugkom na daardie gebied," sê Debra Sauer, 'n woordvoerder vir die munisipaliteit.
"Hoewel die munisipaliteit en Kaapse Natuurbewaring kan help met sekere aspekte van bobbejaanbeheer, kan inwoners en besoekers baie help deur toegang tot potensiële kosbronne te verminder."
Die munisipaliteit het twee voltydse werknemers wat verantwoordelik is vir bobbejaanbeheer. "Hulle val onder die beskermingsdienstedirektoraat en hanteer klagtes soos wat dit aangemeld word."
Die publiek kan op die volgende maniere help:
Hou jou vullisdromme toe, skuifdeure gesluit en vensters en deure toe, veral wanneer jy uitgaan en/of wanneer troppe in die nabyheid is.
As jy vensters wil oophou, installeer diefwering met openinge kleiner as 8 cm. Moenie jou troeteldier se kos buite los nie. Moenie wilde voëls en diere op die erf voer nie, aangesien dit bobbejane lok.
Moenie vrugtebome of groentetuine plant of komposhope maak nie, tensy dit in 'n hok is, of omhein is met 'n elektriese heining.
Geen toegang tot kos
Sauer sê vir hierdie maatreëls om effektief te wees, moet alle inwoners van 'n woonbuurt wat deur bobbejane besoek word, 'n gesamentlike poging aanwend om te sorg daar geen toegang tot kos is nie.
"Bobbejane sal meer geredelik aanbeweeg as daar nie iets is wat hulle kan eet nie.
Van die voorkomende maatreëls is om bobbejaantroppe te onderskep by hulle toegangspunte uit die berge en hulle weg te jaag met pepersproeigewere. Verder reageer die bobbejaanbeamptes wanneer vernietigende optrede en rondloperbobbejane in residensiële gebiede aangemeld word.
Sy vra inwoners wat vermoed dat 'n spesifieke bobbejaan of trop 'n probleem veroorsaak, om foto's te neem en aantekeninge te maak van hulle optrede asook van besonderhede van die bobbejaan of bobbejane wat dit makliker sal maak om hulle uit te ken.
"As data bewys dat 'n spesifieke bobbejaan die oorsaak is van 'n probleem, kan bobbejaanbeheermaatreëls insluit dat daardie dier uitgesit word as 'n laaste uitweg."
Sulke inligting kan deurgegee word aan die munisipaliteit se bobbejaanbeheerafdeling: 044 801 6350 (kantoorure) en 044 801 6300 (na-ure) of sprins@george.gov.za.
Vir raad oor maniere waarop las van bobbejane verminder kan word, skakel Kaapse Natuurbewaring by 044 802 5300.
Hulle sit hand by veral waar aggressiewe bobbejane in hokke gevang moet word.