Gr. 8 - volgende hoofstuk van skoolloopbaan
GEORGE - Vir baie leerlinge in gr. 8 het Maandag 15 Februarie seker soos hul eerste dag op skool gevoel. Dit was die begin van hul sekondêre skoolloopbane.
By Hoërskool George het leerlinge van vroeg af by die hek opgedaag waaronder talle gr. 8's streng Covid-19-protokolle gevolg het.
Pastoor Hilton Langeveldt van Tipping Point Prayer Network George het op 'n ramshoring geblaas. Hy en Joseph Jaer van dieselfde instansie het saam by die hekke van die skool gebid kort voordat die nuwe skooljaar begin het. "Die kinders se opvoeding lê ons na aan die hart," het hy vertel.
Langeveldt het gesê dit is nodig dat kerk en skool hande vat in die opvoeding van kinders. Die ramshoring se blaas is soos 'n gebed sonder woorde. Die klank wat vrygestel word herinner mense dat hulle gereed moet wees op die wederkoms van Jesus.
Charlene Ruiters van Conville het haar dogter, Joy Trantraal (13) kom afsien by die skool. Dit was Joy se eerste dag in gr. 8. Sy het vertel dis 'n uitdaging vir kinders om nou op skool te wees. Sy is opgewonde oor die nuwe tydvak in haar lewe. Dis wel 'n aanpassing want leerlinge moet byvoorbeeld maskers in die klaskamers dra. Sy wil na skool medies gaan studeer.
Charouise Gordon het haar seun, Lorenzo (13) skool toe geneem. Hy was opgewonde en nie bang nie. Hy weet nog nie wat hy eendag na skool gaan doen nie.
Die nuwe skooljaar vir leerlinge by Hoërskool Outeniqua het ook Maandag 15 Februarie amptelik begin.
Dit was egter nie die eerste dag terug op die skoolterrein nie. Woensdag 10 Februarie het gr. 9's en 10's administratiewe take afgehandel en handboeke ontvang. Donderdag was dit die gr. 11's en 12's se beurt.
Die gr. 8-leerlinge is Vrydag 12 Februarie by die skool verwelkom. Streng Covid-19protokolle is gevolg.
Christo Vorster, die skool se hoof, het gesê 370 gr. 8-leerlinge het Vrydag aangemeld. Sover bekend is dit die grootste groep gr. 8-leerlinge in die skool se bestaan.
Altesaam 322 gr. 12leerlinge is vanjaar by die skool. Dit is 'n groter groep as verlede jaar. Die gr. 12-leerlinge moet elke skooldag by die skool wees en die ander groepe wissel elke tweede dag.
Die skool het 84 onderwysers en hulle het reeds twee weke gelede begin.
Covid-19-regulasies word gevolg om seker te maak dat almal veilig is. Volgens hom is die skool goed voorbereid en hulle sien uit na die nuwe skooljaar.
Die kinders se opvoeding lê ons na aan die hart.