Totsiens Urwin
GEORGE - Die gewildheid van wyle
Urwin da Silva was Saterdag 13 Februarie duidelik sigbaar, toe mense te midde van streng Covid-19-protokolle, in Plantasieweg in Pacaltsdorp, opgedaag het vir sy begrafnis. Mense het sosiale afstand gehandhaaf en in lang rye aan weerskante van die straat gestaan en gesit. Die 69-jarige Da
Silva het Saterdagaand 6 Februarie in ‘n motorongeluk gesterf.
Kort voor die verrigtinge, het lede van die Pacaltsdorp Riding Club op perde ‘n verbyrit by die familie se huis gedoen.
Verskeie huldeblyke is gelewer en ‘n woorde-prentjie is geskets van iemand wat diep spore in die breë George-gemeenskap en veral in Pacaltsdorp, getrap het.
Cecil Noble het ‘n brief namens Tertuis Simmers, Wes-Kaapse minister van menslike nedersettings en voorsitter van die DA se oosstreek, voorgelees. Simmers kon nie teenwoordig wees nie.
Simmers het onder meer geskryf dat Da Silva se nalatenskap inspirerend is en ‘n voorbeeld vir die wat agterbly. Hy was altyd bereid om die behoeftes van ander mense eerste te stel. Noble het Da Silva as ‘n pragtige mens beskryf met vele talente. Hy sou nie wou hê mense moet hartseer wees op sy begrafnis nie. Hulle moet eerder lag.
Een van die mense wat aanwesiges wel laat lag het te midde van die hartseer, was pastoor Rodger Daniels van die SuidAfrikaanse Voetbalfederasie Protea Legends. Hy het ‘n staaltjie gedeel oor een van die rugbywedstryde waarin Da Silva vir die destydse Proteas teen die Luiperds uitgedraf het.
Da Silva was ‘n flank en kon ook skepskop. Saam met hom in die span was die bekende Errol Tobias wat losskakel gespeel het. Toe Da Silva in ‘n stadium met ‘n skepskop die bal oorklits wou Tobias weet wie is nou eindelik die “flyhalf ”.
Kidron Kaboni, jare lange vriend, het gesê Da Silva se lewe was niks skyn en afwykings nie. Toe hy in 1974 vir die Proteas teen die Britse Leeus speel was dit die groot hoogtepunt van sy lewe.
Sam May het gesê Da Silva het geweet waar sy hulp en krag vandaan kom. Hy het ‘n verhouding met Hom gehad. Hy het hom beskryf as vredeliewend met uitstekende menseverhoudings. Sy betrokkenheid by die gemeenskap is bewys van sy liefde vir sy medemens. John Rondganger van die United Congregational Church van Suid-Afrika Pacaltsdorp (UCSSA) wat ‘n geestelike en godsdienstige boodskap gelewer het, het gesê Urwin da Silva het met sy lewe gewys daar is hoop. Hy het baie gehelp en onder meer Pacaltsdorp platgery om mense van diens te wees. As al die kilometers op sy bakkie (voertuig) kon praat, sou dit vertel het van Pacaltsdorp en die see.
Blanche Benjamin, voorsitter van Gwaiingrivier-aksiegroep, het gesê die reis eindig nie met sy dood nie. Dis net ‘n ander roete. Hy het baie gedoen vir menseverhoudinge en kon mense bymekaar bring.
Lizette da Silva, skoondogter, het almal namens die familie bedank vir hul ondersteuning en hul woorde van bemoediging.
Na die geleentheid het verteenwoordigers van sportkodes ‘n erewag gevorm terwyl die kis met sy liggaam na die lykswa gedra is. ‘n Privaatverassing word vandag gehou.