Gesonde spyseniering soos nooit vantevore
Green Cup is die breinkind van professionele sjef, Chris Steenekamp, wat sy passie vir fynproewersgeregte aan inwoners in Mosselbaai en George bekendstel.
Chris het ‘n groot liefde vir kos en veral vars bestanddele.
Hy het al as sjef gewerk in die Slow Lounge op OR Tambo internasionale lughawe asook op die gesogte Rovos Rail. Dié passievolle kosliefhebber het vantevore lesings in sy vakgebied by ‘n hotelskool aangebied en het behoorlik sy merk in die kosbedryf gemaak.
Green Cup fokus op gesonde spyseniering en fynproewersgeregte. Inwoners kan gevriesde etes by Chris bestel en sodoende tyd en moeite spaar, terwyl hulle steeds gesond eet. Die etes word geriefshalwe tuis afgelewer.
Hy bied ook interessante dienste aan, soos om vir ‘n groep mense by hul huis ‘n ete voor te berei of selfs om tydens 'n geselligheid die braai te hanteer, terwyl die gasheer en -vrou met hulle gaste kan kuier en ontspan. "Dit sal egter braaivleis wees soos wat min al geproe het," meen Chris. Green Cup voorsien tydens so 'n geleentheid al die bestanddele en sit dan watertandgeregte voor.
Die kos en voorleggings word deur Steenekamp self aangebied. Green Cup handhaaf ‘n hoë standaard en bring ‘n verfrissende diens aan inwoners van die Tuinroete wat lief is vir goeie gehalte kos en puik, afgeronde diens. Kosaflewerings vind plaas vanaf Danabaai tot in George.
Chris bied ook groter funksies aan, soos byvoorbeeld troues en dek gebiede tussen Kaapstad en George.