Georgiete help honger KZN
Plaaslike inwoners, sakeondernemings en instansies maak hul harte oop vir mense in KwaZuluNatal en Gauteng wat in nood verkeer as gevolg van die plundery wat verlede week voorgekom het. Winkelrakke in veral KZN is leeg en bydraes vir die geweldgeteisterde provinsie se inwoners stroom in. ‘n Besending van George is vroeg Woensdagoggend, 21 Julie, na KZN geneem.
Ds. Attie Stander, leraar van die NG kerk Bergsig, het gesê die gemeente is aangegryp deur beeldmateriaal op TV wat wys hoe mense in lang toue wag vir kos.
Die gemeente het kontak gemaak met kerke in Pietermaritzburg en gevra hoe hulle kan help. Kos en bydraes word in George ingesamel en dan gekanaliseer na dié kerke.
Die gemeente is ook betrokke by ‘n jaarlikse Msinga-uitreikaksie - ‘n gemeente onder druk tussen Dundee en Ladysmith in KZN. Fondse word oorgeplaas na die leraar by Msinga sodat hy kos kan koop.
Die Bergsig-gemeente is self verantwoordelik vir die brand*stofrekening sodat die kos en ander items na KZN vervoer kan word.
Dit beloop op die stadium sowat R30 000.
As daar kos en ander items oorbly, sal dit na die Garden Route Food Pantry (GRFP) geneem word.
Bydraes vir KZN sluit in geld, kos vir mense en diere, sowel as toiletbenodighede.
“Ons doen dit, want dit is wat Jesus gedoen het. Jesus was betrokke by mense in nood,” sê Stander.
Stander het onlangs eers uit Mpumalanga in George aangekom. “Die steun uit die plaaslike gemeenskap is ‘n riem onder die hart.”
Hy het benadruk dat die hulpverleningsprojek bestaan uit interkerklike samewerking. Bydraes is ontvang van oor die breë gemeenskap.
Kosspens
Carl van Blerk, stigter en besturende direkteur van die Garden Route Food Pantry (GRFP), sê Triton Express het ingestem om die voedsel vir hulle te vervoer.
Meer as vier ton is reeds ingesamel. Die publiek het ‘n half ton geskenk terwyl Afrishore in Mosselbaai ‘n ton kos geskenk het. Bydraes is ook ontvang van instansies in Mosselbaai en Riversdal.
Die eerste vrag het Woensdag 21 Julie vertrek en as daar steeds ‘n behoefte is, sal nog ingesamel word. Mense kan skenkings aflewer by die GRFP in Glazestraat in George. Hulle moet dit duidelik merk KZN.
Van Blerk sê GRFP voel geroepe om KZN te help, want tydens die verwoestende brande in Knysna in 2017 en in George in 2018, het mense van regoor Suid-Afrika hulp aan die Tuinroete verleen.