Bos van onheil op brandskedule
'n Groot stuk grond, wat inwoners van Delvillepark kopseer gee, gaan in die nabye toekoms gebrand word as deel van die munisipaliteit se beplande skedule tydens brandseisoen.
'n Inwoner van Delvillepark, Archie
Stripp, het sy kommer uitgespreek oor die beboste area wat grens aan Corporationen Lynxstraat. Volgens hom skep die area geweldige probleme met haweloses wat in die bosse slaap.
"My huis en ander woonhuise grens aan hierdie gebied. Misdaad het toegeneem en ons is sagte teikens vir boosdoeners," het Stripp gesê.
Munisipale woordvoerder Chantèl Edwards het by navraag gesê die area is groot en ontoeganklik vir 'n trekker, weens die welige plantegroei en rommel wat in die gebied gestort is.
"Ons parkeafdeling het onlangs die area saam met George-brandweerdienste hersien en 'n besluit is geneem om dit by die beplande skedule vir beheerde brande te voeg," het sy gesê.
"Neem asseblief kennis dat die brandseisoen eers in Oktober begin en enige beheerde brande is geheel en al afhanklik van die korrekte weerstoestande. Ons kan nie op hierdie stadium presies aandui wanneer die beheerde brand sal plaasvind nie, maar kennisgewings sal aan die publiek gestuur word via die munisipale toepassing, die Facebook-bladsy en munisipale webwerf."
Haweloses op munisipale grond kan by die wetstoepassingsafdeling 044 801
6350 gerapporteer word. In so 'n geval kan die antigrondbesettingseenheid geaktiveer word. Indien haweloses 'n probleem veroorsaak by privaat eiendom moet dit by die polisie aangemeld word.