Jong ruiter bereik groot hoogtes
'n Groot eer het 'n plaaslike lewensredder Tanya Osborne, te beurt geval. Sy gaan van 20 tot 26 September aan die
World Lifesavings Champs in Riccione, Italië, deelneem in die 45 tot 49 jaar ouderdomsgroep.
Osborne vertrek oormôre, Saterdag 17 September, na die buiteland. Die geleentheid vind elke twee jaar plaas. Dit was veronderstel om in 2020 plaas te vind, maar is weens Covid-19 afgestel.
Die kompetisie word op twee vlakke beslis: in 'n swembad en in die see. Lewensredders se vaardighede word op verskeie vlakke getoets en hulle kry punte daarvoor. Dit word oor drie dae beslis.
Sy het 'n lang pad geloop en is al verskeie jare by swem en lewensredding betrokke. Osborne kom oorspronklik van Zimbabwe en het later saam met haar familie na SuidAfrika verhuis.
In 1985 het sy in Natal by lewensredding betrokke geraak. Sy het daarvan gehou en sy het later mededingend begin deelneem.
Sy het ook junior Springbokkleure in tweekamp en provinsiale klere in lewensredding en swem verwerf. Sy het ook provinsiaal waterpolo gespeel.
In 2012 het sy na George verhuis.
In die verlede het sy die SA lewensredder van die jaar-toekenning gewen en vir ses maande in Amerika op 'n uitruilprogram gewerk. Sy het ook as 'n professionele lewensredder vir vyf jaar in Amanzimtoti, Natal gewerk.
Sy sien baie daarna uit om in Italië te gaan deelneem. So byna het dit nie gebeur nie, want in Mei vanjaar, het sy 'n skoueroperasie ondergaan. Sy moes eers behoorlik herstel.
Osborne is baie lief vir die sport en dit sal vanjaar die laaste keer wees wat sy in die bepaalde ouderdomsgroep kan deelneem. Die volgende kampioenskappe na die huidige kampioenskappe, is in 2024 in Australië. As sy dan wil meeding sal dit in die ouderdomsgroep 50 tot 54 moet wees.
Haar advies aan mense as hulle in die see swem, is om hul beperkings te ken. As jy in die moeilikheid beland, moenie paniekerig raak nie, probeer net dryf.
Swem ook te alle tye waar lewensredders aan diens is en gehoorsaam hulle.
Die 16-jarige Lila Theunissen van Wilderness, het haar derde provinsiale victrix ludorum vir die jaar ingepalm by die Oos-Kaap-provinsiale jeug perdespringkampioenskappe die afgelope naweek.
Dié gr. 11 leerder van Hoërskool Outeniqua is aangewys as die victrix ludorum in die 1,30 m/1,35 m-kompetisie op haar perd Frosty Barak, en haar posisie as een van die topruiters in Suid-Afrika bevestig.
Vroeër die jaar het sy twee victrix ludorums by die Wes-Kaapkampioenskappe gewen. Een in die 1,30 m/1,35 m-klas met Frosty Barak en een in die 1,10 m-klas met Superstar. Sy het ook uitstekende prestasies behaal met Superstar in die 1-ster Eventing en 6de in SA gekom.
Theunissen moes Star egter om finansiële redes verkoop.
"Dit is baie hartseer wanneer ek enige dier moet groet wat hulle hart vir my gegee het. Perdry is egter 'n baie duur sport wat baie harde werk en opoffering vra. Ek is so dankbaar vir die geleenthede en die ongelooflike ondersteuning wat ek wel kry," sê die dapper klein blondekop.
Theunissen se ma, Lana, is haar handlanger en haar chauffeur en hulle spandeer baie ure saam aan die sport. Haar afrigter, Kelly Searle, is ook 'n topruiter wat uitstekende prestasies met haar leerlinge behaal.
Alhoewel perdryklere-borge Lila goed ondersteun, en sy ook 'n handelsmerkambassadeur vir Tackshop is, is daar twee berge wat sy nog moet klim - haar matriekeksamen volgende jaar en die wete dat Frosty naby aan aftrede is en sy 'n nuwe bekostigbare perd moet kry wat haar na selfs groter hoogtes kan vat.
Intussen droom sy van ‘n borg wat SA kampioenskappe in Shongweni, Natal sal moontlik maak.