Georgiet treur oor koningin se heengaan
Onder die miljoene mense regoor die wêreld wat Maandag op televise die begrafnis van wyle koningin Elizabeth gevolg het, was Bronwyne Ely van Hoopstraat én haar gesin ook vasgenael voor die televisie. Terselfdertyd het haar ma, Aynsley Edwards wat in Plymouth, Brittanje woon dit ook op televisie gevolg. Hulle het tydens die geleentheid per WhatsApp-boodskappe met mekaar gekommunikeer.
Ely is 'n groot bewonderaar van die Britse monargie. Haar man is van Kanadese afkoms. Buite haar woonplek het 'n Union Jack gehang. Dit is uit respek vir koningin Elizabeth.
Die diens het Maandagoggend plaasgevind in die Westminster-abdy. Dieselfde plek waar Elizabeth in 1953 as koningin gekroon is en in 1947 met prins Philip getroud is.
Nog 'n diens is Maandagmiddag in die
St. George-kapel gehou. Maandagaand is 'n privaat familie diens gehou.
Die Britse hoofstad, Londen het Maandagoggend tot stilstand gekom en streng veiligheidsmaatreëls het geheers.
Die diens in die Westminster-abdy is deur verskeie wêreldleiers en koninklikes bygewoon.
Volgens Ely was dit soos geskiedenis wat ontvou het. Sy sou dit vir niks in die wêreld mis nie, “Ek sal dit altyd onthou.”
Die kerkdiens en liedere wat gesing is, het haar diep geraak. Die prosessie waar die koninklikes agter die kis aangestap het, het ook ‘n diep indruk op haar gemaak. Dit het haar laat dink aan wyle prinses Diana se begrafnis in 1997.