George-oumotorskou loslit op pad na 2023
Reëlings vir die George-oumotorskou 2023, wat op 11 en 12 Februarie plaasvind, is goed op koers.
Die skou sal weer by Eden HTS plaasvind - die 26ste oumotorskou. Die skou is een van die hoogtepunte op die George-kalender en word uitstekend ondersteun.
Verlede jaar se skou is gekanselleer en vanjaar was daar steeds Covid-protokolle in plek om getalle te beperk. Feesgangers is in verskillende tydgleuwe op die perseel toegelaat.
Alewijn Dippenaar, voorsitter van die skoukomitee, het Maandag 12 September gesê hulle sien baie uit na aanstaande jaar se skou sonder beperkings. Die organiseerders het reeds navrae van belangstellendes ontvang. Vanjaar se skou is op die internet gestroom en het tot gevolg gehad dat daar selfs belangstelling uit die buiteland is vir 2023 se skou.
Besoekers pas selfs hul bestaande planne aan sodat hulle die skou kan bywoon.
Benewens die motors sal daar weer onder meer trekkers, modelle van motors en voertuie, 'n biertent, en verversingstalletjies wees.
Voertuiginskrywings open op 1 November en mense wat belangstel in stalletjies by die skou, kan ook navraag doen.
Die afsnypunt vir motors in die oumotor-afdeling is 1975, maar daar is ander afdelings waarin jonger motors ingeskryf kan word.
Dippenaar sê sowat 1 000 voertuie word gewoonlik uitgestal. Sestig motorklubs vanoor die land is genooi om deel te neem. Mense kan ook individueel hul motors inskryf.
Tussen 14 000 en 16 000 besoekers stroom na George gedurende die twee dae van die skou - 'n wonderlike hupstoot vir die plaaslike ekonomie.
"Dis loshande die grootste fees in George wat toeskouergetalle betref. Die uitstallers kom van regoor Suid-Afrika. Hulle maak gebruik van oornag en ander geriewe in die gasvryheidsbedryf, maak tenk vol en koop kos. Dit beteken 'n reuse-ekonomiese inspuiting vir George."
Mense wat belangstel kan Dippenaar bel by 082 457 5675 of www. scocc.co.za besoek.