Malle gejaag in Glenwoodlaan-Oos

Johan Vogel, George:

Ons is woonagtig in Glenwoodlaan-Oos, in die Kraaiboschpark-kompleks in die pad wat lei na die Groenkloof-aftreeoord. Ons is nou ‘n geruime tyd bewus van die geweldige verkeer wat hierdie pad verduur. Die pad het ‘n spoedgrens van 50km/h en motoriste hier gebruik dit asof daar geen spoedgrens bestaan nie. Wat sal dit verg om ‘n paar spoedhobbels hier aan te bring? Dis ‘n malle gejaag van konstruksievoertuie van alle groottes, afleweringsvoertuie van en na die Groenkloof-restaurant, seniors wat op en af ry met hulle beplande roetes en dan sekuriteitsvoertuie wat natuurlik, met die druk van iemand se paniekknoppie, soos mal goed hier verbykom!

Behalwe vir die verontagsaming van die spoedgrens, is hierdie pad totaal onvoldoende vir die hoeveelheid verkeer wat dit gebruik.

Dit begin vanaf 05:00 soggens en is onophoudelik tot ongeveer 20:00 saans.

Met die hoeveelheid voertuie wat alleenlik in die Groenkloof-aftreeoorde gebruik word, sowel as die Kraaiboschpark en Ridge-ontwikkelings wat tans in aanbou is, verwonder ek my hoe die ontwikkelaars van hierdie reusekomplekse hoegenaamd verby die munisipaliteit gekom het betreffende die indien van die impakstudies op die terrein en die alleentoegangsroete wat GlenwoodlaanOos dan uitmaak? Daar is al beloftes gemaak oor verdere uitgangsroetes wat in beplanning is, maar wanneer? Moet daar altyd eers ‘n probleem ontstaan voor ons gaan wakker skrik?

Toe die destydse brand hier in die Saasveldgebied ontstaan het, wat weens die sterk bergwind reguit hierheen oorgetrek het, was die mense van Groenkloof afgesny van die res van die dorp as gevolg van die vlamme wat Glenwoodlaan onveilig en onrybaar gemaak het. Wat het van daardie verslag geword waar ‘n noodtoestand net-net afgeweer is?

Hierdie pad is boonop te nou. Die senior burger-bestuurders wat hiervan gebruik maak, beleef elke keer ‘n benoudheid, veral by die diensingang van Kraaiboschpark, waar die pad vanaf die 90°-draai en die pad vanaf Groenkloof ontmoet. Die paaie kom nie eers mooi ooreen nie en as mens van die een of die ander rigting kom, lyk dit of die aankomende voertuig direk in jou baan aankom.

Die konstruksievoertuie moet dikwels met die linkerwiele van die pad af hou om verby te kom. Hoe kan ons dan met hierdie veiligheidsrisiko saamleef ?

Boonop stap van ons seniors daagliks met hierdie roete.

Die deel van Glenwoodlaan wat vanaf die weste kom, is onderbreek deur ‘n geblokkeerde doodloop, wat keer dat die motoriste nie na die oostelike deel kan deurry nie. Die roete wat vanaf CTM in Knysnaweg by Kraaibosch Village verbykom word so ewe met ‘n stopteken geëindig, asook die roete vanaf Groenkloof. Kan ek net ‘n vraag aan die komitee rig wat daardie nuttelose stoptekens op ‘n 90°-hoek aangebring het, wat hulle doel daarmee was? Dit was sekerlik nodig toe daar ‘n volledig gebruikte Glenwoodlaan was om te keer dat die verkeer vanaf Knysnaweg nie voor die deurvloeiende Glenwoodlaan inry nie?

Soos George en omgewing met rasse skrede uitbrei, dink ek ons verkeersafdeling en munisipaliteit moet saamgroei om sulke knelpunte te identifiseer en vroegtydig uit te sorteer.

Kommentaar:

George Herald het al verskeie keer klagtes oor hierdie pad gepubliseer. Georgemunisipaliteit se onlangse kommentaar was dat die verbreding van die pad sal afhang van wanneer ontwikkelaars gereed is om met hulle ontwikkelingsregte voort te gaan. Die munisipaliteit sal slegs bydra tot die pad indien dit die ontwikkelaar is van sy gedeelte grond in die gebied.

Groenkloof se kommentaar was dat alle ontwikkelaars wat in Kraaibosch ontwikkel, finansieel bydra tot die padnetwerkmeesterplan vir die Kraaiboschgebied. Elke ontwikkelaar moet volgens sy ontwikkeling se rit-opwekking finansieel bydra tot die ontwikkeling van die paaie.

Die padnetwerk-ooreenkoms bepaal dat padbydraes gemaak moet word alvorens eiendomme in ‘n ontwikkeling mag oordra. Die ooreenkoms moet konsekwent toegepas word om te verseker dat die paaie deurlopend aan die behoeftes van ‘n groeiende gemeenskap voldoen. "Groenkloofontwikkelaars is angstig dat die pad verbreed moet word en aangesien nuwe ontwikkelings nou begin het, behoort hierdie ontwikkelings se padbydraes binnekort hiervoor aangewend te word. Die munisipaliteit is in beheer van die vordering van padbydraes deur die ontwikkelaars en die uitvoering van die padmeesterplan."

Kraaibosch se ontwikkelaars wou nie kommentaar lewer nie.