Good nader regshulp vir vergaderings
Die Good-party het hom tot regsaksie gewend in 'n poging om Georgemunisipaliteit te dwing om afstand te doen van virtuele raadsvergaderings, en soos in die jare voor Covid-19 fisiese vergaderings te reël.
Die munisipaliteit het bevestig dat hulle 'n brief van die Good-party se prokureur ontvang het en dat die saak ondersoek sal word. Luidens terugvoer van die munisipaliteit sal hulle mettertyd op die saak reageer.
Good se streekwoordvoerder, Donovan Saptoe, voer aan dat hulle rede het om te glo dat George se raadsvergaderings tans onderdrukkend is en teen die grein van hul demokratiese beginsels. "Die hoofrede vir die aksie van Good is om te verseker dat raadsvergaderings in George-munisipaliteit in lyn is met wetgewing en met reëls en regulasies," het hy gesê.
"Dit kom voor asof die speaker en selfs die burgemeester hulle regtig min steur aan die brief wat Good vir hulle gestuur het. As 'n eerste stap moet ons hulle 'n brief en tyd gee om die foute reg te maak. Dis teleurstellend dat die speaker maar net voortgaan met totale disrespek en voortgaan om raadslede uit te sit wat nie met hom saamstem nie. Ons gaan die saak so ver dryf as moontlik. Good se posisie was en is altyd dat die breë publiek vrye toegang moet hê tot die raadsvergaderings."
Tydens virtuele vergaderings kan die publiek inskakel deur YouTube. Raadslede moet egter skriftelik hul vrae rig deur 'n platform (chat box) wat nie vir die publiek sigbaar is nie. Vele klagtes is al deur die opposisie oor hierdie gebruik geopper.
Luidens terugvoer van Georgemunisipaliteit glo hulle nie dat enige oortredings ingevolge wetgewing aangegaan is nie. "Dienslewering, die lewens en die welstand van die gemeenskap sal in ag geneem word met enige besluit wat geneem word," lees hul kommentaar.