Scheun se dood ‘n groot verlies
Die skielike dood van die Suid-Kaapse sakeman David Scheun, en die tragiese aard daarvan, was en is 'n onmeetlike verlies vir sy familie en groot vriendekring.
Die 55-jarige Scheun van George was saam met sy gesin in Jongensfontein naby Stilbaai toe hy op Dinsdagoggend, 10 Januarie, omstreeks seweuur besluit het om alikreukel te gaan uithaal en hy vermoedelik 'n hartaanval gekry het.
Watertite Guttering is in 1973 gestig. Sy suster, Nelia Jansen, is die besturende direkteur van die groep en David Scheun het die George-tak in 1998 begin en bedryf.
Tussen die twee van hulle het hulle dit tot 'n reus in die bedryf vir soomlose geute uitgebou.
Dat Scheun groot waardering en respek as sakeman by sy werknemers en kliënte ingeboesem het, blyk uit die huldeblyke wat op Facebook instroom. Sy voortreflike loopbaan is gekenmerk deur sy professionele, eerlike en deugsame aanslag en uitstekende kliënteverhoudinge en met sy gelykmatige temperament en gebalanseerde uitkyk op die lewe het hy talle vriende oor 'n wye spektrum gemaak. Sy kalmte en waardigheid was aansteeklik vir almal met wie hy homself omring het.
Maar dis as gesinsman, vader en eggenoot wat hy uitgestaan en 'n navolgenswaardige voorbeeld gestel het. Sy onvoorwaardelike liefde vir sy vrou en twee dogters was welbekend en hy het hulle met liefde en algehele toewyding omarm. Vir die res van sy familie was hy die gom wat gesorg het dat niemand ooit kontak verloor nie.
'n Troosdiens word eerskomende Saterdag 21 Januarie om 11:00 by Fancourt Hotel gehou.
Vir enige navrae kontak Nelia Jansen by 083 303 5066.
Scheun word oorleef deur sy vrou, Chrisma, en sy twee dogters Elke en Minke, en sy broer Hein en suster Nelia.