Oorskot in digte bosse in Pacaltsdorp gevind
Minder as twee maande nadat twee mans se liggame naby grotte langs die Schaapkoprivier agter in Pacaltsdorp gevind is, is 'n derde liggaam se oorskot Maandagoggend in die bosse tussen die rivier en Seemeeustraat gevind. Die liggaam is vermoedelik uitgebrand en die oorskot is in die as gevind.
Volgens ingeligtes het inligting wat die polisie opgevolg het in die verdwyning van Masihano Carelse (17) van Pacaltsdorp, ondersoekers na die toneel in die bosse gelei. Masihano is laas op 23 Desember in Reigerpark gesien toe hy die huis waar hy gebly het, verlaat het.
Die polisie het die week nie veel inligting bekendgemaak nie en het ook nie bevestig dat die liggaam uitgebrand is nie, maar ingeligte bronne sê beendere is Maandagoggend en Dinsdag tussen die as gevind.
Die Suid-Kaapse polisiewoordvoerder, sers. Chris Spies, het by navraag gesê die polisie het ‘n dossier vir ’n geregtelike doodsondersoek geopen na aanleiding van die vonds.
“Die ondersoek na die vermiste tiener het ons na die area gelei waar die oorskot gevind is. Deskundiges het die area gefynkam vir leidrade wat tans opgevolg word.
Die polisie het ook DNS-monsters geneem wat na ons forensiese laboratorium gestuur sal word om die persoon se identiteit vas te stel,” sê Spies.
Enigiemand met inligting oor die voorval of Mashiano se verdwyning, kan die ondersoekbeampte, ao. Joseph Rondganger skakel by 044 803 9134 of 073 946 6473.
Hierdie is die derde liggaam in die afgelope twee maande wat die polisie in dié area gevind het.
Nog twee jong mans se liggame, Isaac-Lee Ismail Ayford en sy vriend en buurman, Andy Stoffels (25), is Saterdag
19 November 2022, naby die grotte langs die Schaapkoprivier gevind. Die rivier is naby Seemeeustraat.
Albei liggame is later die middag met behulp van die EMS-reddingshelikopter herwin. Stoffels kon aan sy tatoeëermerk uitgeken word, maar Ayford se liggaam was té ver ontbind en is deur DNS-toetse geïdentifiseer.
Die presiese oorsaak van die mans se dood moet nog vasgestel word.
Die polisie het ook hier ‘n dossier vir ’n
geregtelike doodsondersoek geopen, maar na gelang van die volledige uitslae van die nadoodse ondersoek kan die klagte verander.
Die ondersoeke in beide die bogenoemde voorvalle duur voort.