Tieners drink vir ‘n jaar net water
Twee tieners, Jordan Kruger en Neil Engelbrecht, het vir 'n hele jaar net water gedrink in plaas van enige ander vloeistowwe. Wanneer hulle familie en vriende verlede jaar 'n koppie koffie of 'n koeldrank nadergetrek het om saam met 'n maaltyd te nuttig, het die twee 16-jariges water gedrink.
Hul poging het op 1 Januarie 2022 begin en op 1 Januarie vanjaar het hulle weer ander vloeistowwe begin drink.
Kruger kon nie wag dat middernag op 31 Desember aanbreek nie, want toe het hy vir die eerste keer in 'n jaar weer 'n koeldrank gedrink.
Hy vertel dat alles begin het toe hy homself wou toets om te sien of hy selfdissipline het. Hy het begin met sy poging om net water te drink. Daar was wel uitsonderings soos wanneer hy medisyne moes drink. Van sy vriende het aanvanklik ook deelgeneem aan die poging, maar net Engelbrecht het enduit saam met hom volgehou.
Die feit dat Engelbrecht dit saam met hom gedoen het, het gehelp, want dit het beteken hulle kon mekaar verantwoordbaar hou.
Voor sy poging het hy nogal van Coke gehou, maar dit was nie moeilik om dit op te hou drink nie.
Een van die grootste uitdagings was groepsdruk. As hy byvoorbeeld saam met sy ouers of vriende na 'n sosiale geleentheid gegaan het, was daar die versoeking om iets anders as water te drink.
Hy het geen onttrekkingsimptome gehad nie. Sy poging het in die somer begin en toe was dit maklik om water te drink. Daar was ook moeilike tye om vol te hou soos in Junie gedurende die winter.
Dit het hom nie net op fisieke vlak gehelp nie, maar ook op sielkundige vlak. Dit het hom gewys dat hy kan vasbyt. Hy sal dit ook aanbeveel vir ander mense.
Jordan se pa, Peet Kruger, het gesê toe sy seun na hom gekom het met die idee was hy maar skepties. Hy wou by Jordan weet of hy weet waarvoor hy hom inlaat. Hy is baie trots op sy seun.
Engelbrecht het gesê die eerste paar weke was moeilik, maar later het hy dit gewoond begin raak. Hy sal dit weer doen. Hy het dit gedoen omdat hy homself wou uitdaag.