Museums moet ‘lewe’
Een van die eerste doelwitte van die nuwe voorsitter van die George-museum, dr.
Okkie Stander, is om dit 'n "lewendige plek" te maak. Hy wil die persepsie afbreek dat museums dooie plekke is.
Stander, wat bekend is in kultuurhistoriese erfeniskringe en 'n jare lange inwoner van George, is onlangs tot voorsitter verkies.
George-museum is een van vier provinsiale museums in die Wes-Kaap. Die ander is die Bartolomeu Dias-museum in Mosselbaai, die Mediese-museum in Kaapstad en die Worcester-museum.
"Ons stad se museum is bekend as die Houtmuseum en voorwaar iets om op trots te wees. Dit is op die oomblik gesluit vir instandhoudingswerk en opknapping. Dit sal waarskynlik weer in Maart oopgestel word vir die publiek."
Volgens Stander is ‘n museum se funksie om te versamel, te dokumenteer, te bewaar, na te vors, uit te stal en om opvoeding uit te bou en te versterk.
"Ek sien George-museum as die plek waar die gemeenskap se geskiedenis lewendig aangebied moet word. Dit staan ook in die middel van die houtbedryf van Suid-Afrika. George is die geboorteplek van byvoorbeeld die baie bekende Volkwynstoel, baie houtmeubels is hiervandaan die binneland ingestuur. Dit is onder andere my droom om die museum lewendig te hou en dit vir almal toeganklik te maak."
"Dit moet die hele gemeenskap verteenwoordig. Die museum behoort ook 'n plek te wees wat besoekers en inwoners wil besoek."
Een van die eerste dinge wat hy gaan doen is om 'n inligtingsessie te hou oor die houtbedryf in die Suid-Kaap.
Hy wil die museum meer bemark en bekendstel. Die museum het ruimte wat deur instansies en organisasies gehuur kan word vir geleenthede en vergaderings. Die kunsvereniging van George gaan 'n groot kunsuitstalling in die museum hou.
Hy gaan poog dat nie net skilderye uitgestal word nie, maar ook dat praatjies oor die skilderye gehou word. Daar moet veral inligting oor kuns aan die jeug deurgegee word.