Geesdrif vir gr. 1
Nie eers reën en beurtkrag kon gister, Woensdag 18 Januarie, die geesdrif demp toe talle graadeentjies vir hul eerste skooldag opgedaag het nie. Vir talle was dit nie so 'n vreemde ervaring nie want hulle het reeds 'n voorsmakie van skool in gr. R gehad.
George Voorbereidingskool
By George Voorbereidingskool het ouers en hul kinders reeds van voor 07:00 by die skool se hekke opgedaag.
Hulle is deur onder meer Lokkie Fourie, die skoolhoof en ander opvoeders welkom geheet.
Sy het gesê daar is sover 835 leerlinge by die skool ingeskryf en hulle is baie opgewonde oor wat wag.
Tertuis Simmers, WesKaapse minister van menslike nedersettings en sy eggenoot, Monique, het hul seuntjie Alexander (7) skool toe gebring. Hulle was saam met Alexander opgewonde oor die volgende hoofstuk in sy lewe. Een van sy oupas het ook saamgekom.
RW van Aswegen (7) was een van die eerste graadeentjies wat opgedaag het. Hy wil eendag 'n dieredokter word.
Laerskool Denneoord
By Laerskool Denneoord moes die hoof, Herman du Plessis, behoorlik bontstaan om seker te maak dat alles reg verloop. Die kinders en ouers is vroeg gisteroggend tydens 'n spesiale seremonie verwelkom.
Die skool is vanjaar 60 jaar oud en groot feesvieringe word beplan.
St. Mary’s Primêr
By St. Mary’s Primêr het Olga Tyatya met haar dogtertjie Iviwe (6) opgedaag. Sy was bietjie emosioneel, dit is haar laaste kind wat haar skoolloopbaan begin.
Sibusiso Lubibiso het sy dogtertjie Minenentle (6) na Hibernia Primêr geneem. Sy was bietjie skaam en het gesê sy is nie bang vir skool nie. Sy is opgewonde en wil eendag 'n dokter word. Sy is lief vir haar vriende.