Kenners bespreek stygende koerse
PSG Wealth in samewerking met SentraalSuid Koöperasie (SSK) het op Donderdag 12 Januarie 'n interaktiewe bespreking gehou. Daar is onder meer gesels oor koalisievorming in die politieke arena en die moontlike implikasies wat dit op die stygende inflasie- en rentekoerse van SuidAfrika kan hê.
Die hoof- uitvoerende beampte van
SSK, Francois Swanepoel het gesê die landboulandskap in Suid-Afrika is spesifiek gefokus op landboubesighede en hy het gesê waar die SSK daarby inpas. SSK strek vanaf Robertson in die weste tot en met Plettenbergbaai en van Stilbaai in die suide tot sover as Aberdeen in die binneland.
"Ons is so in 'n negatiewe omgewing. Ons word so gebombardeer met baie negatiewe nuus wat in Suid-Afrika aangaan dat ons met hierdie sessie die positiewe uit die politiek en die ekonomie wil voorlê," sê Swanepoel.
"Met ons by SSK gaan dit goed en kom ons kyk positief na die jaar en beplan positief vir die jaar."
Verder sê Swanepoel dat elkeen moet seker maak dat mense op hoogte moet wees met veranderings in die ekonomiese en politieke landskap, sodat besighede en persoonlike lewens daarvolgens aangepas kan word om jou strategieë vir 2023 reg te kry.
Prof. Dirk Kotzé, politieke analis verbonde aan Unisa, het uit 'n politieke oogpunt Suid-Afrika se politieke situasie wat vermeng is met die ekonomiese situasie en die nuwe tendense wat besig is om plaas te vind, bespreek. Sy bespreking het veral klem gelê op die herverkiesing van President Cyril Ramaphosa as die ANC president.
"Dit bring die ANC in 'n beter posisie omdat Ramaphosa in 'n sterker posisie is om veral sy ekonomiese beleid te implementeer," sê Kotzé.
Volgens hom is daar baie mense wat voel dat daar nie veel momentum agter dit is nie en dat Ramaphosa self onseker was oor sy toekoms.
"Ons boeregemeenskap is die kern vir voedselsekerheid en werk in die landbousektor en hulle wil sekerheid hê oor die toekoms en watter risiko's die toekoms vir hulle gaan inhou,"
Impak van stygende inflasiekoerse
Francois van Wyk van PSG Wealth het met die besoekers gesels oor die stygende inflasieen rentekoerse en die impak wat dit op finansiële markte het. "Die volgende 10 jaar gaan wees soos die 1970's wat gekenmerk is deur oorloë, hoë oliepryse en hoë inflasie," vertel van Wyk.
"Ons boodskap is dat jy jou beleggings so moet hanteer dat jy minder belê in finansiële bates en meer in vaste eiendom belê wat inkomste genereer en waar jou huurinkomste saam met inflasie elke jaar ook styg."
Hy beveel ook aan om nie op hierdie stadium te belê in goud nie, maar daar kan wel gekyk word na ander kommoditeite soos olie, platinum en palladium. "Hou meer kontant want met hoë rentekoerse kry jy 'n groter opbrengs." "Kommoditeitsaandele sal 'n goeie belegging wees asook waardeaandele in die energie-sektor," sê Van Wyk.