Bruiners nou ‘n Blou Bul
Antonia Bruiners (18), gebore Oudtshoorniet, is nou 'n Blou Bulrugbyspeler! Bruiners het verlede jaar groot opslae gemaak toe hy die SA skolespan gehaal het na 'n uitstekende Cravenweekrugbytoernooi.
Sy insluiting in die Blou Bulle volg nadat sy agent verlede jaar, toe hy in matriek by Hoërskool Outeniqua was, reeds opsies ontvang het om by die junior-rugbystrukture van WP, Maties en Blou Bulle aan te sluit.
Volgens sy trotse ouers, Johann en Antoinette Bruiners, was die aanbod van die Blou Bulle te goed om van die hand te wys; en om alles te kroon, is Antonio ook 'n sportbeurs by die Universiteit van Pretoria aangebied.
"Ons is verskriklik trots op wat ons jong seun tot dusver in sy sport- sowel as akademiese-loopbaan bereik het. My woorde aan hom is altyd om getrou aan ons Hemelse Vader te wees in alles wat hy aanpak. Hierdie is 'n goeie geleentheid vir hom waarvoor ons almal hard gebid het en ons het geen twyfel dat hy 'n reusesukses daarvan sal maak nie," sê Antionette.
Johann sê op sy beurt dat die aspek wat vir hom die meeste uitstaan van sy seun, is sy tawwe geestelike ingesteldheid en sy streng selfdissipline wat hy aan die einde van die dag lê.
"Kyk, Antonio is geen vreemdeling vir beserings in sy jong loopbaan nie, maar die manier hoe hy dit hanteer, het ek groot agting voor. Hierdie tipe ingesteldheid gaan beslis vir hom 'n groot bate vorentoe wees wanneer hy, soos in die geval met elke professionele sportman, met beserings gekonfronteer sal word. Hy kan egter met selfversekerdheid terugkyk en sê, been there, done that."
Johann sê verder dat hy sy seun baie gaan mis, veral Vrydae as hy hom in George by die koshuis gaan haal het.
"Dit was ons me-time wanneer ons lekker oor ditjies en datjies kon gesels het en ek dan hier en daar bietjie vaderlike advies gegee het. Gelukkig kan ons video-oproepe maak as ek en sy ma hom te veel mis," skerts hy.
Benewens Antonio se uitstaande rugbyloopbaan, het hy ook in 2020 sy eie
100 m-hekkiesrekord by die Spar Top-10atletiekbyeenkoms gebreek en is hy ook al in die SWD o.15- en 13-krieketspan opgeneem.
In 2020 was hy die Oudtshoorn Burgemeester Sportman van die Jaar asook SWD Laerskool Sportman van die Jaar. Hy het al SWD-atletiekkleure in die 100 m en 80 m verwerf en was hy ook SWDrugbykaptein op laerskoolvlak.
Antonio se rugbyloopbaan lyk beslis blink as 'n mens in ag neem dat daar 'n moontlikheid is dat hy in die toekoms in die Curriebeker-rugbyspanne opgeneem kan word en selfs vir oorsese spanne gewerf kan word; en wie weet, selfs vir die Springbokke.