Arende bou aan visie vir 2024
Groot afwagting heers vir die SWD Arende se eerste wedstryd van die seisoen wat Saterdag 21 Januarie by NMU Saasveld plaasvind. Die span draf dan uit in 'n opwarmingswedstryd teen NMU.
Volgende Woensdag speel die Arende teen Griekwas in Mosselbaai en 'n paar dae later op 28 Januarie teen 'n WPuitnodigingspan op Outeniquapark.
Afskoptyd vir die wedstryd tussen die Arende en die Griekwas op Woensdag, 25 Januarie, is 16:30. Dit word by die Van Riebeeck Stadion in Mosselbaai gehou.
Ofskoon dit opwarmingswedstryde is, behoort dit 'n goeie aanduiding te wees van vanjaar se rugbykrag in die Arende se geledere.
Die Arende het reeds in November laasjaar met voorbereidings vir die nuwe seisoen begin en dit weer verlede week hervat na 'n kort vakansiebreek.
Anton Moolman, die hoofafrigter, is 'n groep van sowat 35 spelers saamgestel. Van die spelers is op 'n proeftydperk.
Die volgende twee tot drie weke is 'n baie belangrike deel van die voorbereidings.
Die opwarmingswedstryde is 'n goeie geleentheid vir van die jonger spelers om te wys waartoe hulle staat is.
Die plan is om teen die einde van die reeks opwarmingswedstryde, blootstelling aan alle spelers te gegee het. Dit sal geleentheid vir die afrigtingspan gee om te sien hoe die spelers druk hanteer.
Alles bou op na die eerste amptelike wedstryd op 11 Februarie teen die OP Olifante. Dis 'n tuiswedstryd vir die Arende.
Vanjaar word daar in twee kompetisies meegeding. Daar is basies 'n SA kampioenskappe waarin die ses spanne in die eerste divisie van die Curriebeker sal meeding. Dit vind tussen 11
Februarie en 15 Maart plaas.
In die gewone eerste divisie van die Curriebekerreeks is daar ook vyf internasionale spanne van Spanje, Namibië, Kenia, Zimbabwe en Israel.
Die eindstryd van die Curriebekerreeks is op 17 Junie en die SA kampioenskappe op 24 Junie.
Moolman sê hy wil 'n omgewing vestig waar spelers kan leer en hy wil die kerngroep behou. Hy het benadruk in moderne rugby kan 'n span nie sonder 'n goeie pak voorspelers, wat kan domineer, speel nie. Die aspek het reeds baie aandag gekry.
Die Arende wil aanvallende rugby speel en spelers moet die bal gebruik. Die spelpatroon sal nie deur die voorspelers oorheers word nie. Hy wil sien dat voorspelers kwaliteit balbesit skep en verseker.
Na 'n byna 'n jaar as afrigter van die Arende het hy bepaalde indrukke. Hy het onder meer geleer om die gemeenskappe te verstaan en goeie werksverhoudinge met die klubs te vestig.
Volgens Moolman is uitslae belangrik. Die span bou aan 'n visie vir 2024. Dit is om te wen en te kwalifiseer vir die volwaardige Currieberreeks in 2025.
In die huidige groep is baie jong spelers en die gemiddelde ouderdom is 22 jaar. Baie van hulle is van die streek en ander van ander plekke. Sover is hy gelukkig met hoe dinge verloop.
Die span het verlede jaar derde in die reeks klaargemaak. Hulle het 10 wedstryde in die eerste divisie van die Curriebekerreeks reeks gespeel waarvan hulle ses gewen en vier verloor het.