Cronjé kampioenskap los
Cronjé Beukes (17), een van die land se topjunior bergfietsryers, het die afgelope naweek skoonskip gemaak by die WesKaapse padfietskampioenskappe in Wellington. Cronjé het tydens die laaste 10 km die spreekwoordelike seile gespan en met ’n uitstekende solopoging as wenner van die 125 km-roete geseëvier.
Onder afrigting van sy oom, Matthys Beukes, self een van die land se topryers, is Cronjé tans die Wes-Kaapse junior padfiets, bergfietsmaraton en veldwedrenkampioen.
"Ons is tans besig om te werk vir deelname aan die SA padkampioenskappe wat vroeg in Februarie in Oudtshoorn gehou word. Cronjé het alles wat nodig is om daar ’n droomwedren te ry," het Matthys Beukes gesê.
In samewerking met Synergy Cycle Sports en Cycle for Diabetes is Beukes druk besig om ’n ondersteuningsbasis vir die topjunior ryers in die Suid-Kaap neer te lê.
"Ons sit met ongelooflike talent in die area en ek besef dat die juniors net meer ondersteuning nodig het. Om jou drome na te jaag is nie iets wat mens alleen kan aanpak nie, glo my. Hoe gouer ons ’n goeie struktuur vir die span kan kry hoe gouer gaan ons wêreldklas resultate vir ons area sien," het Matthys Beukes gesê. Beukes het self topresultate op die wêreld se bergfietsverhoog behaal en is in 2019 as die 7de beste bergfietsmaratonryer ter wêreld gerang.
Die komende naweek pak Cronjé die Attakwas Mini aan (juniors word nie toegelaat op die ultra wedren nie) en gaan poog om vir sy 3de agtereenvolgende keer die wedren te wen. Sy afrigter is self die enigste ryer met drie Attakwas Extremetitels agter sy naam. Die Switserse, wêreldkampioen, Christoph Sauser het twee van hierdie titels agter sy naam.
"Ons het rede om baie opgewonde te wees oor wat die junior ryers van ons area alles kan behaal, ek is eerste in die ry om hulle te ondersteun en ek nooi enigiemand met ’n passie vir sport en die area uit om deel te word van hul ondersteunings groep," het Matthys Beukes gesê.
Vir meer inligting oor hoe om betrokke te raak kontak gerus info@synergycyclesports. com of besoek www.synergycyclesports.com.
Cronjé het alles wat nodig is om daar ’n droomwedren te ry.