Reën bring geen groot skade in George

Sover bekend het die ongunstige weertoestande wat groot dele van die WesKaap die afgelope langnaweek geteister het, geen ernstige skade in die Tuinroete en Klein Karoo aangerig nie. Reën en wind het in die Overberg, die Kaap en dele van die Kaapse wynlande groot ontwrigtings veroorsaak.

Wouter Jacobs, senior rampbestuurbeampte van die Garden Routedistriksmunisipaliteit, het Dinsdag 26 September gesê die swaar weer het die Kaap en Overberg gelyk getref.

Aanvanklik was dit 'n vlak 9-waarskuwing vir die Tuinroete, maar dit is Maandag afgegradeer na 'n vlak 6-waarskuwing. Daar was in stadiums ook waarskuwings vir erge wind en hoë seedeinings.

Garden Route-rampbestuur het Sondagoggend 'n vergadering gehad nadat die waarskuwings uitgereik is. Al die rolspelers van die onderskeie munisipaliteite is verwittig en die distriksmunisipaliteit se gesamentlike operasiesentrum is ook geaktiveer.

Hier en daar is berigte ontvang van bome wat omgewaai is, dakplate wat afgeruk is en water wat in huise gespoel het, maar geen vloedskade nie.

Jacobs het benadruk die samewerking van die onderskeie rolspelers het 'n groot rol gespeel om die skade te beperk.

By Bergoord in Oudtshoorn was daar Maandag sowat

100 mense vasgekeer nadat 'n river afgekom het. Die river het intussen gesak en die mense het Woensdagoggend na veiligheid vertrek. In 'n stadium was 'n pad na Karatara gesluit, maar die inwoners was nie afgesluit van die buitewêreld nie. In die stadium lyk dinge goed.

Teen gister, Woensdag 27 September, was die Swartbergpas, Meiringspoort en Prince Alfred-pas en enkele ander distrikspaaie nog gesluit.

Die Suid-Afrikaanse Weerdiens het die volgende reënvalsyfers verskaf:

• George-lughawe (geval in die voorafgaande 24 uur): 39,7mm - 24 September 9,6mm - 25 September 27,5mm - 26 September

• George Witfontein (geval in die voorafgaande 24 uur): 42mm - 24 September

7mm - 25 September

48mm - 26 September