Interdik teen bouers slaag in hooggeregshof
Drie subkontrakteurs wat werk aan mense van die Blanco-gemeenskap verskaf het, moes Donderdag 21 September die bouperseel by Mountain View Estate, Golden Valley-rylaan, verlaat. Een van die kontrakteurs het vir die afgelope maand op die terrein met 'n tent gekamp, terwyl ander die persele waaraan hulle gebou het, beset het.
'n Dringende interdik deur die ontwikkelaar, Mutizone (PTY) LTD (trading as Sable Cape), wat in die Kaapse hooggeregshof gedraai het, het laat verlede Donderdagmiddag geslaag. Daar is ook 'n kostebevel teen die respondente, wat volgens 'n ingeligte meer as R200 000 sal beloop.
Dit volg nadat die betrokke subkontrakteurs, Silverback, Four Brothers en Shaun Projects, sowat 'n maand gelede hul bouwerk gestaak het en die persele waaraan hulle gewerk het, beset het. Hulle het hul bouersretensiereg uitgeoefen. Die dispuut was oor finansiële vergoeding.
Luidens die subkontrakteurs se prokureur, Francois van Zyl, het hulle aangedui dat hulle te min betaal is.
Die hoof van Sable Cape Developments, Sarel van Niekerk, het verlede Vrydagoggend aan George Herald gesê beide kontrakte wat deur die subkontrakteurs geteken is, is deur Mutizone geëer. "Hulle is elke sent betaal," het hy gesê. "Die dispuut was gebaseer op 'n algemene brief van ses maande gelede, wat nie meer relevant is nie. Die subkontrakteurs het staatgemaak op 'n bouersretensiereg wat nie meer geld nie."
Hy het gesê dat hierdie 'n hartseer dag vir die Blanco-gemeenskap is. "Soveel gesinne kon eet deur die werk wat hier verskaf is. Dit is so jammer wat hier gebeur het.
Nou kyk ons vorentoe. Daar is kopers wat moet intrek, wat al wou intrek. Ons sal waarskynlik nou hulp van elders moet inspan om die knoop deur te haak, aangesien ons nie van hierdie kontrakteurs gebruik kan maak nie."
Volgens Van Zyl het die bouwerk by vyf eiendomme vir 'n maand lank stilgestaan. Intussen het ander subkontrakteurs, waaronder AK Construction, Chicco Malaudzi Construction en Nico Construction, voortgebou aan die eiendomme waarmee hulle besig is.
Alex Kirkwood van AK Construction het aan George Herald gesê hy is heeltemal tevrede met die ontwikkelaar: "Ons het 'n goeie verhouding." Ook Malaudzi, 'n subkontrakteur van Thembalethu, het te kenne gegee dat hy tevrede is met sy kontrak en geen probleme met die ontwikkelaar ondervind nie.
'n Voormalige hoofskakelbeampte, Aldred Kaffoen, wat verantwoordelik was vir gesprekvoering tussen die subkontrakteurs en die ontwikkelaar, het vandeesweek gesê die drie subkontrakteurs is nog nie klaar met die saak nie: "Die hof het nog nie ons saak aangehoor nie, dit het net oor die interdik gegaan. Ons is tans in gesprek met ons prokureur. Ons voel ons het nog 'n voet om op te staan."
Kaffoen is van mening dat kontrakbreuk plaasgevind het, sowel as onderbetaling.
"Dit is ook nonsens dat daar nie nog subkontrakteurs en bouers in Blanco is nie," het hy gesê. "Ons is die armste buurt in die dorp en trek aan die kortste ent."