Tannie Beattie nog flink op 100 jaar
'n Oudinwoner van Heroldsbaai, Beattie Hicks, het op 8 September 100 jaar oud geword en George Herald het gaan inloer waar sy kuier by haar oudste en enigste oorlewende dogter, Antoinette Holtzhausen (76), eienaar van Makarios in Gerickeshoek by dié baai.
Die merkwaardige tannie Beattie, wat tot op 92 nog gewerk het, geniet steeds sulke goeie gesondheid dat sy haar eie motor kan bestuur, self kan kos maak en haar eie huis by Genevafontein-aftreeoord aan die kant maak.
Tannie Beattie het nie gesondheidsprobleme nie (sy drink net 'n pilletjie vir die hart) en 'n ondeunde glinstering in die oë verklap 'n brein wat nog flink werk.
"Ek het nog my eie tande. Die dokters kén my nie," gesels sy. Drie jaar gelede toe sy 'n bo-arm gebreek het nadat sy 'n paar trappe ver geval het, het haar buitengewone vinnige herstel die dokters verbaas. Haar verblyf in die rehabilitasie-eenheid van Groenkloof was vir haar "soos 'n vakansie", want die mense daar was vriendelik en het gedurig by haar ingeloer.
Tannie Beattie loop deesdae met 'n kierie, maar ook net om te keer as sy dalk haar balans wil verloor.
Haar ouers het in die Kangovallei naby die Kangogrotte geboer. Sy is in die Oudtshoornhospitaal gebore en het aan die destydse Girls High (vandag polisiekwartiere) gematrikuleer. Daarna het sy in Standardbank op die dorp gewerk vanwaar sy ná die Tweede Wêreldoorlog na Kaapstad verplaas is. Daar het sy haar eerste man, Edelbert Ballot, ontmoet met wie sy 28 jaar getroud was voor hy haar ontval het. Die egpaar het twee dogters gehad van wie die jongste op 59-jarige ouderdom oorlede is.
Tannie Beattie het ook 'n paar jaar in George by Standard Bank gewerk voordat sy en Edelbert vir 18 jaar in die Langkloof gewoon het waar hy 'n plaas gekoop het. Daar was sy sekretaresse vir Agrochem, die maatskappy waarvoor Edelbert gewerk het. Vandaar het hulle op Heroldsbaai kom woon waar dit toevallig gebeur het dat tannie Beattie as verhuringsagent begin optree het vir huiseienaars en later ook eiendomme verkoop het. "Dit was harde werk. Ek het 32 huise en woonstelle verhuur. Ek moes als op papier doen, want daar was nog nie rekenaars nie. Ek het al die somme met my kop gedoen. Baie nagte was ek tot tweeuur in die oggend besig.”
Sy was 92 toe sy die tuig neerlê en die laaste sleutel aan sy eienaar oorhandig. Tannie Beattie het haar ook beywer om water- en kragtoevoer op Heroldsbaai te kry. In die beginjare het hulle nog emmertoilette gehad. Sy was ook die dryfkrag agter die radiotoring op Heroldsbaai sodat hulle ‘n televisiesein kon kry. Dit staan steeds bekend as die Ballotstoring. "Daar was toe oor die 100 erwe in die ou Heroldsbaai waar ek moes omgaan om te hoor of mense bereid is om 'n bydrae vir die toring te gee.
“Dit het R4 000 gekos, wat baie geld was in daardie tyd," onthou sy.
Sy het 18 jaar gelede na die Genevafonteinaftreeoord verhuis.
Staaltjies van toe sy nog in die bank gewerk het tydens en ná die Tweede Wêreldoorlog is nog vars in haar geheue. Haar eerste man het haar leer bestuur in sy blou, ingevoerde Plymouth. Sy het haar bestuurslisensie in 1946 gekry. "My pa was glad nie beïndruk nie, want ek sou kwansuis te veel in die dorp lê," vertel sy guitig.
Sy was 'n tweede keer die bruid in 'n baie spesiale liefdesverhaal.
Haar jeugvriend, Ivan Hicks, wat destyds in die Tweede Wêreldoorlog gaan veg het, het haar met sy terugkeer van die oorlog af gaan opsoek, maar tannie Beattie se ma wou nie vir hom sê waar sy haar bevind nie. Hy is later met iemand anders getroud, maar nadat sy vrou oorlede is, het hy sy eerste liefde in George kom opsoek. Op daardie stadium was sy al vir 35 jaar 'n weduwee. "Ons het mekaar dadelik herken toe ek hom op die lughawe gaan haal het," vertel tannie Beattie.
Hulle het nie lank gewag voordat hulle in die George-Suid NG Kerk getroud is nie, 'n 84-jarige bruid en 88-jarige bruidegom. Hulle was vir agt jaar saam voordat Ivan oorlede is. "Ons was só gelukkig," sê tannie Beattie.
Sy het niks spesiaal gedoen om so oud te word nie. Die feit dat sy aangehou werk het, het haar sterk gehou, vertel sy. "'n Mens moenie gaan sit nie; dan gaan jy dood. En jy moet van alles eet. Nie enigiets uitskakel nie. My gunstelingkos is rys, vleis en aartappels."