Nat Erfenistoer maak dit al die pad
Die swaar reën die afgelope langnaweek kon glad nie die deelnemers aan die SuidKaap Oumotorklub se jaarlikse Erfenistoer se geesdrif demp nie.
Die toer het Vrydag 22 September begin en Maandag 25 September klaargemaak.
Dit was vanjaar die 11de Erfenistoer en van die 26 inskrywings het 25 voertuie die toer voltooi.
Groot opgewondenheid het Vrydag geheers by die wegspring by Halfway George in George, die borg van die toer.
Die voertuie het Vrydag na Riversdal vertrek en vandaar aangedoen by Swellendam, Kaap Agulhas en Arniston. Saterdag is vertrek van Arniston na Baardskeerdersbos en van daar na Danger Point lighuis en terug na Arniston.
Op Sondag, Erfenisdag, is hulle na Bredasdorp, Caledon, Villiersdorp en Bonnievale. Die stoet voertuie het die vloede en oorstromings net-net gemis.
Maandag is hulle na Montagu, Adamskraal (Ladismith), Riversdal en weer terug
na George.
Niel Kasselman, wat vanjaar die tweede keer deelgeneem het, het gesê dit was baie nat. "Dit het baie gereën op die pad. Ons moes maar versigtig wees. Gelukkig het ons geen verspoelings beleef nie."
Hy sê dit was 'n wonderlike belewenis. "My plan is om weer volgende jaar deel te neem. Ek sal dit sterk aanbeveel dat mense deelneem. Vanjaar was daar van die motors wat bietjie probleme gehad het. Halfway Toyota het 'n ondersteuningsvoertuig verskaf en dit het baie gehelp."
Dr. Waldo Scribante, vooorsitter van die die Suid-Kaap Oumotorklub, het gesê alles het goed afgeloop. "Ons het lekker gery en lekker gekuier. Dalk sal ons volgende jaar iewers anders heen gaan - miskien die Karoo."
Hy het sy dank teenoor Halfway Toyota George uitgespreek. "Sonder hulle hulp sou van die voertuie nie klaar gemaak het nie."