Nuwe sosiale netballiga baie gewild
So gewild is die nuwe sosiale netballiga, Net-Social, dat dit weer gaan plaasvind. Die eerste wedstryde het reeds op 2 Augustus plaasgevind en sedertdien het dit van krag tot krag gegaan.
Alexander Venter, die organiseerder, het bevestig dat die vierde kwartaal-liga se registrasies nou oop is tot 30 September en dat die liga van 11 Oktober tot 6 Desember gespeel sal word.
Venter sê in die eerste reeks kon net 'n sekere aantal spanne geakkommodeer word. "Ons moes baie spanne vra om vir die volgende liga in te skryf."
Hy sê die eerste reeks was 'n groot sukses en die mense geniet dit baie om weer te kan speel. "Daar is groot gees by die bane en die kuier en spanwerk is lekker om te sien tussen al die spanne. Net-Social is presies wat dit sê - 'n sosiale netbal-liga gemik daarop om vir mense die geleentheid te gee om weer te kan speel, te leer speel en om iets lekkers saam met vriende, kollegas en die gesin te doen. Dit is nie 'n besigheid nie en word gedryf deur mense wat 'n passie en liefde het vir netbal en sosiale sport."
Dit vind op Woensdag- en Donderdagaande van 18:00 tot 21:00 by Laerskool George-Suid plaas.
"Almal kan deelneem, van 13 jaar en ouer, vrouens en mans, iemand wat wil begin speel en dié wat lanklaas gespeel het en weer wil begin," sê hy.
Besighede kan spanne inskryf vir spanbou en geesvang.
Hierdie keer wil die organiseerders graag vir meer spanne die geleentheid gee om te kan speel. "Ons wil dit daarom oor twee aande 'n week laat plaasvind. Ons kon net 20 spanne in die huidige liga akkommodeer en daarom wil ons nog
'n aand aanbied sodat ons 40 spanne kan akkommodeer."
In die eerste reeks was daar mammaspanne, jong vriendespanne, gesinspanne, besighede wat spanne ingeskryf het en ook gemengde spanne wat gevorm is deur mense wat graag wou deelneem maar nie
'n span gehad het nie. "So ontmoet jy nuwe mense en maak vriende."
Om 'n span te registreer kan hulle per e-pos by netsocialgeorge@gmail.com of per WhatsApp by 063 259 3397 gekontak word.
Spelers wat nie 'n span kan inskryf nie, kan 'n WhatsApp stuur vir die organiseerders, wat sal kyk waar spelers kan geakkommodeer kan word.