Alle paaie lei môre na Outeniquapark
Alle paaie lei Vrydagaand, 29 September, na Outeniquapark wanneer die Arende XV teen 'n Stormersspan speel. Al is dit 'n vriendskaplike wedstryd, is daar vir beide spanne baie op die spel. Die Stormers kom George toe as deel van hul voorbereidings vir die Verenigde Rugbykampioenskap en die Arende sien dit as voorbereiding vir die nuwe seisoen.
Die rugbyfees hou egter nie Vrydagaand op nie, want net 'n week later vind nog vriendskaplike wedstryde op Outeniquapark plaas. Dan speel die Stormers teen die
Sharks en die Arende XV teen 'n WP XV.
Verlede jaar toe die Arende in 'n soortgelyke wedstryd teen die Stormers gespeel het, was Outeniquapark gepak. Die Stormers het toe 94-7 gewen.
Anton Moolman, afrigter van die Arende, het Dinsdag 26 September gesê die span het al bymekaar gekom en het Dinsdagmiddag geoefen.
Hy het met
George Herald
gepraat nadat hy die vorige dag uit Frankryk teruggekeer het waar hy die afgelope paar weke die Wêreldbeker-rugbytoernooi bygewoon het.
Moolman het gesê die Stormers kom hou 'n oefenkamp in die gebied. Die span bestaan uit 'n groep van meer as 40 spelers en die spelers wat betrokke is by die Springbokke in Frankryk is nie deel van die groep nie.
Spelers wat reeds in die strukture is en ook van dié van buite, sal deel wees van die Arendespan. "Dit gee aan ons geleentheid om bietjie diepte te skep en vir ons spelers om op die hoogste vlak te speel. Die Arende speel volgende jaar onder meer in die SA Cup."
Volgens hom is die realiteit dat die
Stormers al waarskynlik van einde Julie begin saamkom het. Die Arende se spelers se kontrakte tree eers 1 November in werking. Die meerderheid van die Arende spelers wat betrokke is by Vrydag se wedstryd sal kontrakte kry.
Moolman het gesê die Arende is vanjaar in 'n beter posisie as met verlede jaar se wedstryd. "Ons gaan beslis nie 'n slaansak vir die Stormers wees nie. Dis vir ons die eerste stap in die regte rigting."
Hy het groot dank uitgespreek teenoor die borge, die Phangela Group, Kiron en die Wilderness Hotel Resort & Spa, sonder wie se steun die wedstryde nie moontlik sou gewees het nie.
Poemas
Die Arendse speel op 20 Oktober ook in vriendskaplike wedstryd teen die
Poemas. Hy het 'n beroep op die Arende se ondersteuners gedoen om die span Vrydag te kom ondersteun en Outeniquapark vol te pak. "Die Stormers speel altyd aanvallende rugby. Ons speel ook aanvallende rugby."
Martin de Vos van
SWD Rugby het gesê die hekke open Vrydag om 15:00. Die hoofwedstryd begin om 18:30 en word voorafgegaan deur 'n o. 15-wedstryd tussen SWD en 'n Vukaspan. Kaartjies kos R80 vir volwassenes en R40 vir kinders. Parkering is teen R20 beskikbaar by die nabygeleë Heatherlands High. Kaartjies sal reeds van vroeg Vrydagoggend by die stadion te koop wees.As mense lang toue die middag wil vermy, kan hulle gerus die oggend al kaartjies gaan koop. Kroeggeriewe sal voor die wedstryd beskikbaar wees.
Die volgende Vrydagaand, 6 Oktober, speel die Arende XV teen 'n WP XV. Die wedstryd begin om 16:00. Die wedstryd tussen die Stormers en die Sharks begin om 18:30.
Voor die wedstryd sal daar geleentheid wees om die spelers te ontmoet. Kaartjies kos R100 vir volwassenes en R50 vir kinders.
Die rugbyfees hou egter nie Vrydagaand op nie, want net ‘n week later vind nog vriendskaplike wedstryde op Outeniquapark plaas.