Bekende in onderwyskringe sterf in ongeluk
'n Legende in die onderwyskringe, Johan van der Merwe (52), is Vrydagmiddag, 16 Februarie, net buite die Kaap in 'n motorfietsongeluk oorlede.
Van der Merwe, die assistentdirekteur van skoolbeheer en -bestuur by die WesKaapse Onderwys-departement, was saam met sy swaer, Ian Braaf, en 'n vriend, Byron Jonas op pad na 'n motorfietsbyeenkoms in Saldanhabaai toe hy omstreeks 17:30 by 'n vierrigting-stopstraat op die Klipheuwelpad (R302) naby Stellenbosch, met 'n VW Amarok-bakkie gebots het.
Hy is op die toneel dood.
Jonas sê alles het voor sy oë gebeur, maar hy wou nie te veel uitbrei oor die tragiese besonderhede nie. Hy sê wel dat een van die inwoners in die omgewing waar die ongeluk plaasgevind het, vir hom vertel het dat daar gereeld ernstige ongelukke by dié kruising plaasvind.
"Ek het dadelik afgetrek en na Johan gehardloop, maar toe ek my hand op sy rug sit kon ek sien dat hy nie meer asemhaal nie. Die nooddienste was vinnig op die toneel, maar hy was reeds oorlede. Hy was 'n bok vir sports en soms lekker ondeund. Hy was altyd vol grappies en truuks by die rallies.
Al die bikers het hom geken en hy was baie geliefd. Hy gaan beslis gemis word by die byeenkomste," vertel Jonas. Van der Merwe was ook die president van die X Tribemotorfietsklub.
Onderwysdistriksdirekteur, Jewel Jonkers, het gesê Van der Merwe was 'n toegewyde en hardwerkende amptenaar, met 'n goeie sin vir humor en 'n vriendelike, deernisvolle en vrygewige persoonlikheid.
"Hy sou ook altyd help waar en wanneer hy kon. Amptenare kon hom nader en seker
wees dat hulle met raad en ondersteuning bedien sal word. Onder sy gesellige persoonlikheid was daar 'n sensitiewe siel.
"Sy werkfamilie simpatiseer met sy vrou, Ruth, adjunkhoof by New Dawn Park Primêr, sy kinders, ma, broers en susters en die uitgebreide familie. Johan sal baie gemis word en hy laat 'n groot leemte in die distrik. Ons het nie net 'n dierbare kollega verloor nie, maar 'n kosbare vriend en broer," het Jonkers gesê.
George Herald het uitgereik na Van der Merwe se vrou, Ruth, maar sy was besig met begrafnis- en ander reëlings. Sy het aangedui dat sy kommentaar sou lewer, maar teen druktyd Woensdagoggend was daar egter nog geen terugvoer van haar af nie.
Begrafnisreëlings
'n Roudiens word vanaand, Donderdag 22 Februarie, by die AGS kerk in Pacaltsdorp gehou en Saterdag sal Johan se begrafnisdiens by Hope Church om 10:00 plaasvind.