Madiba nalatenskap vind neerslag in komberseprojek
Danksy die warm harte van lede van die Eden Knitwits en die organisasie 67 Blankets for Nelson Mandela, sal kinders van die Môreson Kinder- en Jeugsentrum die winter snoesig warm wees onder hierdie komberse.
Die Eden Knitwits en 67 Blankets for Nelson Mandela het Vrydag 5 April 80 komberse aan Môreson in George oorhandig. Buite was dit koud en reënerig, maar waar die komberse oorhandig is, het 'n warm, gemoedelike atmosfeer geheers.
Van die kinders was self teenwoordig om van die komberse in ontvangs te neem. Te oordeel aan hul glimlagte, gaan die komberse hierdie winter handig te pas kom.
Die komberse is deur sowat 106 lede van Eden Knitwits, wat in die Tuinroete gebaseer is, gemaak. Hulle het sedert Januarie aan die komberse gehekel. Van die lede was teenwoordig en kon self sien hoe dankbaar die kinders is.
Carolyn Steyn, die stigter van 67 Blankets for Nelson Mandela en ander lede van die organisasie, het al die pad van Gauteng gekom vir die geleentheid.
Sy het die projek 10 jaar gelede begin. Haar man, Douw en wyle Madiba was groot vriende. Douw is een van die bekendste sakemanne in Suid-Afrika.
Carolyn het vertel dat sy en 'n groepe vriende kort na Madiba se dood in 2013 om 'n etenstafel gesit het, dit was ook Douw se verjaarsdag. Zelda le Grange, wat toe Madiba se persoonlike assistent was, was teenwoordig by die ete.
Hulle het onder meer gepraat oor hoe Madiba se nalatenskap lewendig gehou kan word en wat hulle in 2014 op Mandeladag kon doen.
Zelda het voorgestel dat hulle 67 komberse maak. Carolyn het besef sy sal nie so-iets alleen kan aanpak nie.
Sy het die water op Facebook getoets en vandaar het dinge net gebeur. Dit het selfs 'n internasionale teenwoordigheid ontwikkel. Oor die laaste 10 jaar is meer as 167 000
komberse so versprei. Volgens Carolyn maak hulle elke dag, Mandeladag.
Ria Potgieter, 'n ambassadeur van 67 Blankets in die Tuinroete, het gesê die mense het dit geniet om die komberse te maak.
Die meerderheid van die mense kom van Mosselbaai en hulle kom een keer per maand bymekaar. Die meeste van die wol is skenkings. As mense dalk wol wil skenk sal hulle dit met graagte ontvang.
Bridget van Oerle, skakelbeampte van die projek, het gesê duisende mense regoor Suid-Afrika is betrokke. Die projek groei. Dis nie net die hekelwerk wat gedoen word nie, daar is ook al vriendskappe gevorm.
Volgens haar sal dit wonderlik wees as mense in George betrokke raak. Hulle kan 'n e-pos stuur aan info@67blankets.co.za.
Daar is ook al skole wat betrokke is en by sommige skole is dit deel van die leerplan.
Angelique du Randt, bestuurder van Môreson, het gesê hulle is baie bly oor die skenking. "Dit beteken warm lyfies in die winter en die kinders sal warm slaap in die aande.
"Die moeite en hartsliefde wat ingesit is om die komberse te maak, is baie spesiaal."