Elvis Blue takel fietstog van George na Innibos
Die gewilde sanger en liedjieskrywer Elvis Blue, takel in Junie vanjaar 'n fietstog van meer as
1 500 km oor 13 dae met die oog daarop om mense se aandag te fokus op die behoeftes van weerlose, hulpbehoewende kinders.
Elvis gaan man-alleen op sy fiets vanaf George tot in Mbombela (Nelspruit) ry na die Innibos-fees. Dit is in samewerking met Innibos wat hy hierdie 'Elvis Blue ry vir Skoolgeld'-toer aanpak.
Hy wil met sy grootse poging die publiek se hulp inkry om 'n verskil te maak aan die lewens van minderbevoorregte kinders, en meer spesifiek die kinders van Life Community Services in George en die Nelspruit Lionsklub se Orphan Project in die Daantjie-area in Mpumalanga.
"Hierdie twee organisasies spreek die fisiese en opvoedkundige behoeftes van minderbevoorregte kinders direk aan," sê Elvis.
Hy gaan probeer om fondse in te samel en te bestuur saam met die Atterbury Trust om hoofsaaklik hierdie twee liefdadigheidsorganisasies te ondersteun.
"Atterbury Trust is een van Suid-Afrika se mees gerekende liefdadigheidstrusts wat al vir meer as 26 jaar betrokke is by veral opvoeding, voeding- en gemeenskapsopheffingsprojekte. Ek weier om te leef in 'n wêreld waar kinders met leë magies moet skool toe gaan en iets probeer leer.
Ek weier om net rond te sit met die wete dat daar kinders is wat nie die potlode, penne, boeke of selfs skoene het om mee skool toe te gaan nie; dat daar slimkoppe, sportmanne en musiekmaestros is wat nooit die geleentheid sal hê om bo hulle omstandighede uit te styg nie."
Elvis sê daar is so baie "geraas en behoefte en hooploosheid" rondom ons, dat mense afgestomp raak daarvoor. "My hart raak seer wanneer ouers nie vir hulle kinders kan sorg nie, of wanneer ‘n kind se omstandighede net onmoontlik lyk. Al kan ek net vir ‘n paar kinders doen wat ek wens ek vir duisende kon doen, dink ek dis nog steeds die moeite werd," sê Elvis.
Hy wys daarop dat sowat
9,6 miljoen kinders in Suid-Afrika daagliks deur voedseltekorte geraak word. "Die nagevolge is sosiale en gedragsprobleme, gesondheidstoestande soos belemmerde groei, swak konsentrasie en lae immuniteit. Suid-Afrika het ook een van die mees ongelyke onderwysstelsels ter wêreld wat gebuk gaan onder swak of afwesige infrastruktuur, oorvol klaskamers en chroniese onderprestasie wat die toekoms van ons kinders en dus ons land in gedrang laat.
"Sosiale opnames wys dat ‘n tekort aan skryfbehoeftes en uniforms asook skoolgeld ‘n uiters nadelige uitwerking op skooldeelname het en veroorsaak dat ‘n hoër en hoër koers van kinders tussen 7 en 18 jaar glad nie skool klaarmaak nie."
Elvis sê hy hoop dat sy poging 'n verskil in 'n klompie kinders se lewens sal maak.
Hy oefen al 'n hele paar maande hard vir die toer met die hulp van Spesialized, Coimbra en Enduren.
Sy suster, Kona Brown sê, "Elvis hy is 'n kranige bergfietsryer alhoewel 'n projek van hierdie skaal nog nie iets is wat hy al gedoen het nie. Hy het wel al 'n paar bergfietstoere kafgedraf."
Al kan ek net vir ‘n paar kinders doen wat ek wens ek vir duisende kon doen, dink ek dis nog steeds die moeite werd.
Donasies
Elvis vra dat besighede en die breë publiek betrokke raak deur finansiële donasies of die skenk van enige skoolbenodighede of benodigdhede vir ander fisiese behoeftes.
"Die publiek kan ook ‘n vrywillige skenking maak wanneer jy jou Innibos-kaartjie koop, asook via my sosiale mediaplatforms en op die Atterbury Trust se webstuiste via die Donasiewinkel. Alle finansiële donasies sal via die Atterbury Trust vir liefdadigheidsdoeleindes ingesamel en verantwoordelik bestuur word," sê Elvis.
Vir meer inligting, kontak sy bestuurder, Kona Brown by kona@ elvisblue.co.za.