Vroue staan sterk vir mekaar op Moedersdag
Team Strong Women (TSW), 'n gemeenskapsorganisasie wat al sedert 2020 hulself beywer om vroue op te hef en te bemagtig, hou op Saterdag 11 Mei 'n Moedersdag-spogtee vir minderbevoorregte vroue in Parkdene. Die geleentheid is gratis en alle vroue word genooi na dié lekker bederfdag.
"Weens hul omstandighede kry baie vroue nie die geleentheid om ooit hierdie tipe geleenthede by te woon nie. Baie vroue se kinders en mans is aan tik verslaaf en hulle is in 'n gewelddadige verhouding vasgevang. Werkloosheid speel ook 'n groot rol in die vroue se omstandighede en die toename in geweld en misdaad in ons gemeenskappe," sê TSW se Linda Smit.
Die organisasie het in Augustus 2020 tot stand gekom met die doel om uit te reik na verskillende gemeenskappe en veral om vroue op te hef.
Weens hul omstandighede kry baie vroue nie die geleentheid om hierdie tipe geleenthede by te woon nie.
Die vroue moet dikwels 'n moeilike pad stap wanneer hul kinders en geliefdes se lewenspaaie met dwelms en ander ongewenste faktore kruis. Dit is om dié rede dat TSW besluit het om die vroue in die omgewing 'n kans te gun om net 'n bietjie te ontspan en vir een dag sorgeloos te wees.
"Ons is daar om stukkende vroue te help. Ons gemeenskappe is gebroke en ons vroue kan 'n rol speel om te help. Wanneer vroue bymekaarkom, is dit soos 'n vulkaan van krag wat deurbreek," sê Smit.
Besighede is welkom om betrokke te raak by die geleentheid deur tafels te borg. Agt dames kan by 'n tafel sit.
Die geleentheid begin om 13:00 in die Parkdene-gemeenskapsaal. Bywoners kan hulself gereedmaak vir heerlike vermaak en geleentheidsprekers uit die boonste rakke.
Vir meer inligting, of om 'n tafel te borg, skakel die volgende dames:
Linda Smit: 078 180 5909, Dora Blaauw: 065 103 5038 of Lorrieta Hasley: 074 617 0870.