Chanté weer terug in George vir ‘n etensuurkonsert
Chanté van der Westhuizen (25), die kunstenaar by die etensuurkonsert op
Woensdag 17 April, het haar hoërskoolloopbaan in George voltooi en het in hierdie tyd bekendheid verwerf in plaaslike sangkringe.
Op die sopraan se program vir die etensuurkonsert is onder andere werke van Gonoud (Romeo en Juliet), Mozart (Figaro), Britten, Franse kunsliedere deur Berlioz en Ravel en twee Afrikaanse kunsliedere van Van Wyk. Daar is ook 'n paar ligter liedere deur Rodgers & Hammerstein.
Chanté het van vyfjarige ouderdom af in verskeie kore en musiekkompetisies uitgeblink. Sy het onder Minette du Toit-Pierce haar voorgraadse studies by Universiteit Stellenbosch voltooi, waar sy die aandag getrek het in verskillende kompetisies, en het in verskeie Suid-Afrikaanse operaproduksies opgetree.
In 2021 het sy na Londen verhuis waar sy in 2023 haar Master of Arts in Vocal Performance aan die Royal Academy of Music met lof verwerf het.
In hierdie tyd wen sy ook
groot kompetisies, onder andere die Michel Guillet Award, die Michael Head Song Prize en die Major Van Someren-Godfrey Prize. Haar optredes in die fakulteit se opera-uittreksels sluit in Lucia in Brittens se Rape of Lucretia, Nannetta in Verdi se
Falstaff, Tytania in Britten se
A Midsummer Night's Dream en Zerlina in Mozart se Don Giovanni. 'n Hoogtepunt vir haar in die afgelope seisoen was meesterklasse met die sopraan Roberta Alexander by die wêreldbekende Wigmore Hall.
Die etensuurkonsert vind van 13:00 tot 13:50 op 17 April in die Moederkerk plaas. Toegang is gratis, maar donasies sal waardeer word.