Kindermoord: Man kry twee keer lewenslank
Nóú kan ons genees. Só het John Moos, die pleegpa van die 10-jarige Sharron Arries verlede Donderdag gesê ná Timothy Ova (54), die man wat sy dogter en haar vriendin, Jacorene Vaaltyn (9), vermoor het, twee lewenslange vonnisse in die rondgaande hooggeregshof in George opgelê is.
Ova, wat in 2016 vanuit die Kaap na Albertinia verhuis het, is in Februarie vanjaar op al vyf aanklagte teen hom skuldig bevind. Die klagte sluit in twee van moord, een van dwarsboming van die gereg, een van die onwettige besit van ammunisie en een van onsedelike aanranding wat spruit uit 'n voorval wat in 1999 plaasgevind het.
Regter Matthew Francis het Ova twee lewenslange vonnisse opgelê vir die moord van die kinders. Hy is tot twee maande tronkstraf gevonnis vir die onwettige besit van ammunisie, ses maande vir onsedelike aanranding en vyf maande vir dwarsboming van die gereg. Die vonnisse sal samelopend uitgedien word met dié van lewenslank. Ova sal dus effektief 25 jaar agter tralies wees.
Die dogtertjies se liggame is op Donderdag 22 September 2022 in Ova se woning in Janfiskaalstraat gevind ná hulle die vorige dag as vermis aangemeld is.
Sharon se liggaam is in 'n blou plastiekdrom gevind en Jacorene se liggaam was onder Ova se bed versteek.
Albei was in lakens toegebind. Volgens die getuienis in die hof was Ova die laaste persoon wat die kinders lewend gesien het. Bure het ook getuig dat die kinders glo dikwels by Ova se hek gestaan en wag het totdat hy van die werk sou terugkeer om vir hulle lekkergoed, kos en geld te gee. ’n Maatskaplike werker het die beskuldigde se gedrag as versorging (grooming) beskryf.
Die forensiese patoloog het tydens haar getuienis gesê daar was fyn sand in die kinders se lugweë, neuse en monde gevind wat daarop dui dat die kinders die sand ingeasem het.
'n Ondenkbare wrede dood
Regter Francis het tydens sy uitspraak gesê die kinders het 'n wrede dood gesterf. Hulle is lewend begrawe en versmoor.
Dit was egter die nadoodse ondersoek wat getuig het van die ware afgryse wat die twee dogtertjies, kort voor hul dood, ervaar het. Hul neuse en monde was gevul met fyn sand, hulle het diep skaafplekke op hul voorkoppe, mae, knieë en arms gehad asook ernstige kneusplekke aan hul skedels.
"Een is onder die bed versteek en die ander een onseremonieel in 'n drom gegooi. Dít beklemtoon die beskuldigde se gevoelloosheid," het regter Francis tydens vonnisoplegging gesê. Ova het ook geensins sedert sy inhegtenisneming enige berou getoon nie.
Francis het gesê albei die kinders het uit moeilike omstandighede gekom en Ova het slegs voorgegee dat hy vir hulle omgee om sy weerlose slagoffers te lok, en 'n valse gevoel van veiligheid te skep deur hul kwesbaarheid uit te buit.
"Die beskuldigde het voortgegaan met hierdie gedrag [om lekkergoed, geld en kos uit te deel] nieteenstaande Maureen Vaaltyn se versoek, en waarskuwings deur lede van sy familie, om nie kinders in sy huis te hê of hulle by hom te laat kuier nie."
Tevrede met die vonnis
"Ons is tevrede met die vonnis. Dit bring nie ons kinders terug nie, maar ten minste is hy [Ova] nou waar hy behoort," het Florina Moos, Sharon se pleegma, gesê.
Ná vonnisverrigtinge het Ova steeds aangevoer dat hy onskuldig is van moord en het die vonnis appelleer. Sy aansoek om appèl was onsuksesvol.
Die ondersoekbeampte, ao. Alistair Rezant van die Mosselbaai se eenheid vir gesinsgeweld, kinderbeskerming en seksuele misdrywe, het na afloop van die uitspraak gesê dat hy tevrede is met die vonnis. "Dis waarvoor ons gehoop het. Ek is tevrede."
Ova was deur adv. Flip Theron van Legal Aid SA (Judicare) verteenwoordig en adv. Lenro Badenhorst was die staatsaanklaer in die saak.