Paaie in Themba kry aandag
Die uitbreiding van die Go George-busdiens in Thembalethu het 'n groot hupstoot gekry. Georgeburgemeester, Leon van
Wyk, het Vrydag 12 April met die ter tafellegging van die aansuiweringsbegroting aangekondig dat R505 miljoen van die nasionale tesourie en department van vervoer ontvang is.
Dit moet gebruik word vir die opgradering van paaie in Thembalethu wat belangrik is vir die uitbreiding van die busdiens.
Van Wyk, bygestaan deur
Dirk Wessels, burgemeesterskomiteelid vir finansies van die George-stadsraad, het Maandag 15 April, in 'n onderhoud met George Herald, meer lig op die saak gewerp.
Volgens Van Wyk is dit net soos in ander stede een van die oogmerke om werkers by hulle werk te kry.
Die paaie moet opgradeer word om die lading van die busse te kan hanteer.
Hy het benadruk dat Georgemunisipaliteit dit nie sou kry as die instansie nie sy kant gebring het nie.
Daar is 'n goeie verstandhouding tussen die
George-munisipaliteit en die tesourie. "Daar is direkte toegang tot die nasionale en provinsiale tesourie."
Daar sal so gou moontlik begin word met die opgradering van die paaie. Die befondsing help baie. Dit beteken dat die geld nie geleen hoef te word nie, wat weer koste implikasies het met rente.
Volgens hom word daar op nasionale vlak gekyk na die groei en ontwikkeling in die gebied.
Die nasionale tesourie is voorskriftelik hoe die geld aangewend moet word. Die geld word gebruik om infrastruktuur te vestig sodat ekonomiese groei kan plaasvind.
Wessels het gesê net soos by ander stede is een van die groot uitdagings om mense toegang tot werksgeleenthede te gee.
Hoe meer mense toegang het tot die ekonomie, hoe minder deernisgevalle kan die munisipaliteit uiteindelik hê.
Die nasionale tesourie is voorskriftelik hoe die geld aangewend moet word.
Elektrifisering van informele gebiede
Van Wyk het ook aangekondig dat R1,325 miljoen ontvang is vir die elektrifisering van informele gebiede.
Daar is bereken dat dit sowat R20 000 kos om 'n huishouding van elektrisiteit te voorsien.
Buiten dat dit help om fisiek elektrisiteit aan 'n huishouding te verseker, help dit ook met veiligheid. So byvoorbeeld kan dit help dat mense nie van onwettige elektrisiteitsverbindings gebruik maak nie.