Emmaüs gaan groot in 2024
George Herald het vroeër berig dat die Emmaüs Beskermde Werksentrum vir Volwasse Gestremdes onder groot finansiële druk is weens die gedeeltelike subsidie van die departement van maatskaplike ontwikkeling wat jaarliks krimp.
"Ons moet innoverend en buite die gewone raamwerk van fondsinsameling dink en maniere vind om die stygende kostes die hoof te bied. Ons probeer met min fondse tot ons beskikking die beste moontlike diens aan intellektueel gestremdes lewer wat volhoubaar en toeganklik is," sê Elsabé Badenhorst, hoof van die sentrum.
Emmaüs bestaan uit ‘n residensiële fasiliteit met kamers vir 48 intellektueel gestremdes, asook 60 intellektueel gestremdes vanuit die breë gemeenskap wat gedurende die dag by die terapeutiese stimulering van die werkareas inskakel. Die sentrum voorsien 24 uur versorging aan die koshuisinwoners asook tee en 'n toebroodjie en ‘n middagete aan die dagbesoekers. "Die groot behoefte wat daar bestaan vir hierdie tipe diens word weerspieël in die groeiende getalle en navrae wat daagliks ontvang word," sê Badenhorst.
Emmaüs se houtwerkafdeling maak pragtige houtspeelgoed en ander houtartikels soos skinkborde, kaasborde, en nog vele meer. Die belangrikste is egter die restourasie van houtmeubels en riempiewerk. Hierdie kan baie tydrowend wees en dit het tot gevolg dat daar ‘n wagtyd is vir meubels.
Emmaüs is die enigste vervaardiger van houthangers in George. Behalwe vir die handwerk en naaldwerk wat deur die vroue gemaak word, is Emmaüs ook bekend vir die oortrek van knope.
Fondsinsamelings
Emmaüs hou verskeie geleenthede deur die jaar om geld in te bring en die Manne Afvalgilde het weer in Februarie afgeskop met hulle maandelikse byeenkomste. Manne wat lief is vir afval en belangstel, kan gerus aansluit by die gilde en elke eerste Dinsdag van die maand heerlike afval by Emmaüs geniet. Hulle kan ook vriende saambring wat kan aansluit terwyl daar nog plek is. Wegneemetes is ook beskikbaar vanaf 16:00 op die eerste Dinsdag van die maand. Die Afvalgilde het vanjaar afgeskop met ‘n nuwe voorsitter, Marius Kruger van PSG Outeniqua, en hul byeenkomste is altyd ‘n heerlike kuieraand. Murray Gerber het as voorsitter uitgetree en is as stigter van die gilde ‘n erelid. Kontak vir Natalie by 044 873 4196 of 083 422 2378 vir meer inligting.
Geen Wintermark
Emmaüs gaan nie vanjaar ‘n Wintermark hou nie weens die verkiesing. Hulle beplan egter verskeie maandelikse fondsinsamelingsprojekte.
Hoe kan die gemeenskap betrokke raak? Emmaüs benodig vrywilligers om bedags in die terapeutiese areas hulp te verleen. "Al het 'n persoon net een uur per dag beskikbaar, vra ons dat hulle dit by Emmaüs kom spandeer. Veral persone met houtwerkondervinding is baie nodig aangesien ons net een toesighouer in die houtwerkafdeling het," sê Badenhorst.
Tweedehandse klere, beddegoed, gordyne, en veral kantgordyne is baie nodig.
Witolifantartikels, tydskrifte, boeke - alles wat oorbodig is in jou huis kan Emmaüs gebruik.
"Skoonmaakmiddels is altyd welkom. Toiletware vir ons inwoners is ook 'n groot nood aangesien hulle afhanklik is van slegs ‘n Sassa-toelaag. Materiaal, wol en handwerkartikels is ook baie welkom."
Hou Emmaüs se Facebook-blad (Emmaüs George) dop vir al hulle datums en verkopings. Inligting is ook beskikbaar op hul webwerf, www. emmausgeorge.co.za.
Vir meer inligting, bel Natalie by 044 873 4196 of 083 422 2378.
Die sentrum voorsien 24 uur versorging aan die koshuisinwoners asook tee, ‘n toebroodjie en ‘n middagete aan die dagbesoekers.
Fondsinsamelings vir 2024
26 April: Hoenderbraai- en slaaiverkope (wegneemetes op bestelling van 11:00 tot 18:00).
24 Mei: Teetuin met pannekoek en kolwyntjieverkope (cupcakes) van 09:0012:00: Tweedehandse klerewinkel asook winkel op perseel sal oop wees vir verkope. 26 Mei: PSG Outeniqua/Emmaüs-gholfdag by George-gholfklub. Afslaan is om 12:00. 26 Julie: Roeties met botterhoenderkerrie word verkoop (wegneemetes op bestelling van 11:00-18:00).
2 Augustus: Bingo-aand (tyd sal aangekondig word).
7 September: Damesoggend. Gasspreker, kunstenaar en tyd sal aangekondig word. 30 November: Emmaüs Kermis/Kersmark van 08:00-14:00.
Wegneemetes regdeur die jaar
Daar is vleis- en hoenderpasteie, soutkolwyntjies (savoury muffins) asook gevriesde kosse soos lasagna en sop op bestelling beskikbaar regdeur die jaar.