Matthew is Varsity-beker se beste agterspeler vir 2024
Daar is alreeds vroeër ‘n blink toekoms vir Matthew op die rugbyveld voorspel. Sy jongste prestasie wys dat sy naam gerus onthou kan word.
Matthew Fortuin (22), oudinwoner van Pacaltsdorp, se ster het Maandagaand geskitter toe hy in Bloemfontein as FNB beste agterspeler in die gewilde Varsitybeker-reeks aangewys is.
Die publiek kon vir hom en twee anders spelers stem en uiteindelik het Matthew koning gekraai. Hy was ook vir FNB speler van die reeks genomineer.
Daar is alreeds vroeër 'n blink toekoms vir Matthew op die rugbyveld voorspel. Sy jongste prestasie wys dat sy naam gerus onthou kan word.
Matthew, 'n oudleerder van Hoërskool Outeniqua, speel tans vir die NWU Arende se eerstespan en het verlede jaar aan die Noordwes-universiteit begin studeer.
Hy herstel tans goed van 'n knie-operasie wat hy verlede week ondergaan het.
Dit kom nadat hy verlede Maandagaand, 15 April, in die halfeindronde van die Varsitybeker teen Ikeys kort voor die einde van die wedstryd beseer is.
In 'n onderhoud met George Herald Dinsdag 23 April het hy gesê dat hy glad nie verwag het om genomineer te word nie. "Om die toekenning te kry is besonders. Dis te danke aan my span."
Volgens hom was dit moeilik om te verloor teen Ikeys. "Dit was hartseer." Hy het bygevoeg: "Alle krediet aan Ikeys. Hulle het goed gespeel."
Hy het ook sy dankbaarheid teenoor sy span se afrigter, Burger van der Westhuizen, en die afrigtingspan uitgespreek. "Ek is baie dankbaar vir die geleenthede wat hy vir my gee."
Matthew is ook baie dankbaar teenoor almal van George en Pacaltsdorp vir hul ondersteuning.
"Die besering en herstel is maar moeilik. Ek kan nie baie beweeg nie. Die volle herstel sal ses tot agt maande duur. Later vanjaar sal ek wel weer begin oefen.
“Ek beplan om eers aanstaande jaar weer te speel."
Sy droom is om 'n Springbok te word en Suid-Afrika te verteenwoordig. Oor sy lewenspad sê hy: "Ek weet God het 'n plan vir alles."
Sy trotse ma, Mary-Ann, sê sy, haar man, Jose en Matthew se suster Mary-Jo is baie trots op hom.
Matthew se pa Jose het 21 jaar vir Evergreens en die Bontebokke uitgedraf. "My man is trots op ons seun wat in sy voetspore volg."
Van kleins af het Matthew saam met sy pa na die veld gegaan vir oefening, ook toe sy pa afgerig het. "Hy was onafskeidbaar van 'n rugbybal en het selfs met 'n rugbybal gaan slaap."
As ouers bewonder hulle hom vir sy nederigheid. Oor die toekoms het sy gesê: "As dit die wil van die Here is dat hy Springbok word, sal ons baie trots wees."
Piet Cloete, sporthoof van Hoërskool Outeniqua, het gesê die skool is baie trots op hom.