R50 000 vir gewilde marathon
Die George Outeniquamarathon wat komende Saterdag, 27 April plaasvind, het 'n welkome inspuiting van R50 000 van die dorp se burgemeester, Leon van Wyk, ontvang. Georgemunisipaliteit is 'n vennoot van die jaarlikse wedloop wat oor die afgelope 40 jaar ál meer gewild geraak het.Volgens Duppie du Preez, president van Outeniqua Harriers, is die geleentheid 'n belangrike wedloop op die kalender van SWD-atletiek en die marathon van 42,2 km dien as die heel laaste kans vir atlete om vir die Comrades-marathon te kwalifiseer.
Van Wyk het gesê die wedloop is legendaries en vind plaas langs die mooiste roetes in die land met uitsigte op die berge, bos en see asook die Tuinroetedam wat 100% vol is. Hy het gesê die munisipaliteit is 'n trotse vennoot in die wedloop en ondersteun die gebeurtenis uit die geleenthedebegroting.
Atlete van oor die hele SuidAfrika neem deel en die wedloop het in 2023 bykans 1 000 atlete getrek. Hy het gesê hoewel 2024 se wedloop nie oor 'n langnaweek plaasvind nie, hoop Outeniqua Harriers steeds dat atlete weer in getalle sal opdaag.
Daar is drie verskillende wedlope, 'n 42,2 km, 21,1 km en 10 km.
Die 42,2 km begin by die
Trail Kiosk in Camphersdrift om 07:00, die 21,1 km by die Tuinroetedam om 08:00 en die 10 km by die Wilderness Commonage (oop ruimte oorkant die Wilderness Hotel) om 08:00. Al die wedlope word voltooi by die Wilderness Commonage.
Aanlyninkrywings vir die wedloop het reeds gesluit, maar laat inskrywings kan steeds
Vrydagmiddag, 26 April vanaf 16:00 tot 21:00 by die Trail Kiosk voltooi word vir al drie wedlope. Atlete kan nog Saterdagoggend vanaf 07:00 inskryf vir die 10 km in Wilderness.
Prysgeld is beskikbaar aan kategoriewenners en medaljes aan alle atlete wat die wedloop voltooi.
Daar is verskeie gelukstrekkings met amper 20 paar skoene van
Pivot en Mount CO asook groot verblyfpryse van Lovain Gasteplaas en ander plaaslike besighede.
Vir enige verdere navrae, kontak Esme Boshoff by 084 499 7753.