Reggie Booysen vier 40 jaar by Group Editors
'n Getroue werknemer van Group Editors, Reggie (Reginald) Booysen (59), is vanjaar 40 jaar deel van die maatskappy.
Hy onthou hoe hy as 19-jarige op 1 Mei 1984 by die destydse George and KnysnaPlett Herald ingeval het. Die rolpers was toe nog in Yorkstraat agter die George Printing Company naby die Outeniqua Hotel geleë. Sy pa, Henry, wat langsaan by die oogkundige, Dave Weldon, gewerk het, het koerant se eienaar, Peter Moolman genader om te hoor of hy dalk werk vir sy seun het. "Mnr. Moolman het dadelik gesê dis reg, hulle het iemand nodig, en daar het ek toe my werk gevind."
Dit was in dieselfde jaar wat die koerant verdeel is in George Herald en Knysna-Plett
Herald.
Reggie vertel van daardie dae: "Ek onthou nog hoe mnr. Moolman met die rolle papier op 'n vurkhyser in Yorkstraat afgery het van 'n stoor af wat ons naby Markstraat gehad het.
“Hy het dit gewoonlik rondom toemaaktyd aangery. Ons het toe ook nog nie self die foto's ontwikkel nie. Ek moes tussen ons destydse kantoor, Yorkstraat 72 en George Printing draf om die foto's ontwikkel te kry. Dit was partykeer sommer in die donker onder die straatligte deur."
Reggie was deel van die afdeling wat die koerantblaaie fisies moes saamstel.
"Ek het my vakleerlingskap voltooi en gekwalifiseer. Ons het nog die papierkopie op 'n ligtafel gesny, gegom en geplak voordat dit deur die reproduksiekamera op film vasgelê is. Daarna het ons die plate gemaak. Dit was harde werk en 'n baie omslagtige en tydrowende proses. Ons het soms tot 02:00 in die oggende gewerk.
“Met vandag se tegnologie is dit tonne makliker," vertel hy.
Hy het later ook in die donkerkamer gewerk waar slegs swart-en-wit foto's ontwikkel kon word.
"Ons het destyds nie kleurfoto's gedruk nie. Dit het eers later gekom en is ook geleidelik ingefaseer met net die voorbladfoto wat aanvanklik in kleur gedruk is."
Reggie het sy kinderjare deurgebring in Watsonsdorp wat in die Heatherlandsomgewing naby die destydse Hawthorndene Hotel geleë was. Op 11-jarige ouderdom, met die inwerkingstelling van die Groepsgebiedewet, moes hulle en ander gesinne daar wegtrek.
Die Booysens het in Pacaltsdorp gaan woon, en dis waar Reggie steeds bly.
Group Editors se uitvoerende hoof, Servaas de Kock, het hom bedank vir sy lojaliteit en toewyding.
"Namens die direksie, bestuurspan en almal by Group Editors, baie, baie geluk. Dankie vir wat jy beteken en doen vir Group Editors en mag daar nog baie gesonde werksjare vir jou wees."