Vasgekeerde man gebruik selfoon om te kommunikeer
“Ek was die hele tyd met hom [Delvin] en een van die reddingswerkers in verbinding. Ek het geweet daar is hoop, dat my seun leef en dat hy enige oomblik daar sou uitkom.”
“Ek het gewéét my kind gaan enige oomblik daar uitkom, dit was net 'n kwessie van tyd.” Só het 'n baie verligte Deon Safers gesê ná sy seun, Delvin (29) op Dinsdag 7 Mei uit die puin van die ineengestorte gebou in Victoriastraat gered is.
Hy was een van 'n span van vyf elektrisiëns van Terayne Electrical Maintenance wat op die bouperseel gewerk het. Sy kollegas is nog vasgekeer.
Delvin, wat vir byna 30 uur onder die bourommel vasgekeer was, het gelukkig sy selfoon by hom gehad en kon deurentyd met sy pa en reddingswerkers in verbinding tree.
"Ek was die hele tyd met hom [Delvin] en een van die reddingswerkers in verbinding. Ek het geweet daar is hoop, dat my seun leef en dat hy enige oomblik daar sou uitkom," het sy pa gesê.
Deon kon nie Woensdagoggend die woorde bymekaarsit om te begín verduidelik hoe verheug hy was dat sy seun lewend onder die puin gered kon word nie.
"'n Mens is natuurlik baie bly, maar ek kan amper nie beskryf hoe ek op daardie oomblik gevoel het nie. Ek was baie excited en daar was 'n klomp deurmekaar emosies."
Hy vertel dat sy seun al aan baie geboue gewerk het.
"Hy het Dinsdagaand vir my gesê dat hy nooit sou kon droom dat een op hom sou neerstort nie. Hy was nog baie moeg en getraumatiseerd gisteraand en het ook gekla oor vreeslike pyn in sy bene," het Deon Woensdagoggend gesê.
Terwyl hy vasgevang was tussen die sement en staal, moes Delvin sy foon by tye afskakel om die battery te spaar. "Maandagnag toe is sy foon se battery op 10%," vertel Deon. "Maar dáái 10% het hom deurgedra na die volgende dag toe, en hy kon nog boodskappe stuur. Dit was net die Here se genade."
Deon het Dinsdagaand, ná hy van die hospitaal af gekom het, by die toneel gestop om tot verhaal te kom. "Toe ek terugkom op die toneel het ek vir myself gesê dat dit nét 'n wonderwerk was dat my kind lewend daar uitgekom het. Hulle het vir my gesê dat daar langs hom 'n groot betonblok gelê het wat hom met sentimeters gemis het. As die blok op hom geval het, was hy beslis dood."
Volgens sy pa het Delvin kneusplekke aan sy gesig en kop opgedoen. Hy sterk tans in die George-hospitaal aan.
Wayne Hodgson, eienaar van Terayne Electrical, het sy dankbaarheid uitgespreek teenoor al die reddingswerkers en vrywilligers wat by die ramp betrokke is en gehelp het om Delvin lewend van onder die puin te red.
"Dit was 'n baie lang proses, maar ons moes baie risikofaktore, en die gewig op die blad waaronder Delvin vasgekeer was, in ag neem. Ons is bly hy kon gered word en uit my hart uit bedank ek al die reddingswerkers en vrywilligers vir hulle eindelose ondersteuning."
Delvin se bestuurder, Jannie Laufs, was verheug oor Delvin se redding, maar moes met gemengde gevoelens worstel.
"Dit is maar 'n bitter-soet gevoel. Ek is dankbaar dat Delvin gered kon word. Hy is 'n ware yster en kon ons die heeltyd op hoogte hou, maar my gedagtes keer dan terug na sy kollegas wat nog vasgevang is."