VF Plus spel planne uit vir toekoms
Geen politieke party sal 50% plus een steun in die algemene verkiesing op 29 Mei kry om ‘n regering op sy eie te kan vorm nie. Opposisie partye sal moet saamwerk.
Dit was die boodskap van dr. Pieter Groenewald, leier van die VF Plus, toe hy Vrydag 3 Mei aanwesiges toegespreek het tydens Business Café se gespreksreeks, 'My Vote Counts'.
Die gespreksreeks word aangebied sodat van die kleiner politieke partye mense kan inlig waar hulle staan. Daar word na van die partye verwys as “koningmakers”. Hulle kan ‘n belangrike rol speel in die vorming van koalisies.
Groenewald het Vrydag ‘n inleidende toespraak gelewer en daarna vrae van die gehoor beantwoord.
Hy het benadruk hoe belangrik dit is dat mense gaan stem. “Mense sê hulle is klaar met die politiek,” het Groenewald gesê.
Hy het egter ‘n teenantwoord vir sulke mense: “Die politiek is nie klaar met jou nie. Jou stem kan ‘n verskil maak. Dis ‘n proporsionele kiesstelsel.”
Volgens Groenewald is die Veelpartyhandves wat tussen sommige partye gevestig is, nie ‘n koalisie nie. ‘n Koalisie word eers na ‘n verkiesing gevorm. Die Grondwet bepaal dat ‘n regering binne 14 dae na ‘n verkiesing gevorm moet word. Dis onmoontlik om binne dié tydperk so iets te vorm as daar dan eers met gesprekke begin word.
Groenewald het dit duidelik gestel dat die VF Plus met ander partye sal saamwerk, maar nie met hulle sal saamsmelt nie.
Na aanleiding van vrae uit die gehoor het Groenewald gesê hy is nie ten gunste van ‘n koalisie met Gayton McKenzie, die PA-leier, nie. “Hy is 'n onbetroubare vennoot.”
Groenewald het verwys na ‘n debat by die Aardklop-fees waaraan hy en McKenzie deelgeneem het. McKenzie het toe vir hom gesê as die ANC hom ‘n beter aanbod maak, sal hy dit aanvaar. Daar kan nie op nasionale en provinsiale regeringsfere dieselfde situasie ontstaan as op die plaaslike regeringsfeer nie. Daar moet betroubare vennote wees.
Op ‘n vraag oor afstigting
(sesessie) van byvoorbeeld die WesKaap van die res van Suid-Afrika het Groenewald gesê die party glo in selfbeskikking. Daar is verskillende vorme van selfbeskikking op die verskillende regeringsfere.
Hy glo stadsrade moet weer teruggaan na die afwenteling van gesag. Elke dorp moet sy eie stadsraad kry.
As voorbeeld het hy sy eie situasie verduidelik toe hy burgemeester van Stilfontein was. As hy gehoor het van ‘n pyp wat gebars het, het hy die
stadsklerk gebel en dit is herstel.
Daar moet ook meer magte vir al die provinsies wees.
Op hoër vlak is daar eksterne selfbeskikking. Dit is soos waarvan sommige mense in Skotland te gunste is. Daar is al referendums gehou en hulle wil ‘n onafhanklike Skotland hê.
Die VF Plus beskou dit as ‘n proses om by eksterne selfbeskikking te kom. Geen politieke party kan vir mense eksterne selfbeskikking gee nie. Dis die mense wat moet besluit. Die VF Plus moet sorg dat daar wetgewing is wat voorsiening maak vir mense om te besluit hoe ver hulle dit wil hê.
Die VF Plus is teen sesessie (afstigting). Dit is ‘n onwettige proses. As dit gedoen word sal die leiers toegesluit word en van hoogverraad aangekla word.
Hy glo as ‘n referendum nou oor afstigting van die Wes-Kaap gehou word, sal die voorstanders verloor. “As jy ‘n referendum hou moet jy sorg dat jy kan wen.”
Die VF Plus is ten gunste van verskillende vorme van selfbeskikking.
Dr. Dennis Farrel, stigter van Business Café, het gesê dis ‘n gespreksreeks en ‘n geleentheid om inligting te deel.
Môre, 10 Mei, sal die EFF en ook pastoor John Mathuhle wat namens HOPE4SA sal praat, aan die beurt wees.