Koshuiskinders se kos lont betoging by Hoërskool George
Hoogs ontstoke ouers van leerders wat by Hoërskool George op kosskool is het Maandagoggend douvoordag by die skool met plakkate betoog. Hul kinders het die betoging ondersteun. Die ongelukkigheid gaan oor kos.
Blykbaar het die skoolhoof, Rodney Cupido, verlede Vrydagaand met 'n stemboodskap op ouergroepe laat weet dat daar nie vandeesweek kos vir die leerders wat by die koshuis tuisgaan sal wees nie. Die redes wat aangevoer is, hou verband met koshuisgelde van R1 300 per jaar wat by vele ouers se rekeninge uitstaande is, en subsidievorms vir befondsing van die departement wat nie reg ingevul is nie.
"Die vorms moes al einde verlede jaar weggestuur word na die departement," het een ouer gesê. "Hy hou dit nou terug omdat daar inligting by van die vorms ontbreek."
Alles onder beheer
Terugvoer van die Wes-Kaapse departement van onderwys lyk wel meer rooskleurig. Bronagh Hammond van die departement het Dinsdag 7 Mei terugvoer oor die saak gegee en aangedui dat die kwessies geadresseer en uitgesorteer word. "Ek kan bevestig dat die leerders nie sonder kos is nie," het Hammond gesê.
"Gegewe die omstandighede het die WKOD spesiale reëlings getref om te verseker dat die skool die nodige kos vir die leerders en personeel in die koshuis kan aankoop. Die WKOD het ook met die ouers by die skool gesels en onderrig en lesse is soos normaal hervat."
Uitstaande rekeninge
Volgens Hammond is die departement verlede Vrydag, na aanleiding van 'n oproep van die skoolhoof, van die situasie bewus gemaak. "Die koshuis se kosverskaffer het die skool in
kennis gestel het dat hulle geen aflewerings sou maak totdat die skool sy uitstaande rekeninge betaal het nie." Hierdie situasie is intussen deur die departement beredder.
"Die indiening van beursvorms van die skool aan die distrik het na bewering befondsing vir die koshuis deur die WKOD vertraag," het Hammond verduidelilk. "Die WKOD word deur wetgewing vereis om die nodige vorms en goedkeurings te hê voordat enige begrotingstoewysings oorgedra kan word. Dit word tans aangespreek en opgelos.
"Die WKOD sal met die skole se finansiële komitee in gesprek tree oor die finansiële bestuur van die koshuisbegroting.
Ingevolge die Suid-Afrikaanse Skolewet word daar van skole vereis om een bankrekening te hê, wat ook koshuistransaksies moet akkommodeer. Die skool moet dan dienooreenkomstig begroot en die verskillende befondsingsbronne en kostes vir die koshuis en ander uitgawes wat deur die skool opgeloop word, bestuur."
Hierdie terugvoer kom na aanleiding van vrae van die ouers, wat beweer dat die fondse vir die koshuis wanbestuur word. Hulle was bekommerd omdat die koshuis se rekening aan die skool s'n gekoppel is.
Nog drama
Dinsdagoggend, 7 Mei, was daar weer nuwe moeilikheid by die skool. Blykbaar het van die onderwysers nie vir klas opgedaag nie, omdat hulle glo nie betaling ontvang het nie.
Hierdie onderwysers is glo op kontrakposte aangestel. "Die skool is 'n malhuis," het een van die ouers gesê. Volgens nog 'n ouer het die gr. 12-leerders nie klas gehad vir die dag nie, aangesien die onderwysers heeldag in vergaderings was.
Hammond van die departement van onderwys het egter bevestig dat daar slegs een onderwyser afwesig was vir die dag. Vorige klagtes oor die kontrakte van kontrakposte wat nog nie hernu is nie, is verlede week deur die departement as volg beantwoord. "Daar was kontrakte wat verleng is en word steeds deur hoofkantoor verwerk. Die onderwysers gee tans onderrig in die skool en hul administratiewe dokumente word opgelaai. Die saak word by hoofkantoor hanteer."