Kwagga se wengedig verras met eenvoud en emosie
Die trefkrag van 'n gedig lê dikwels in die eenvoud en emosie wat die woorde oopvou. 'n Mens het nie gesofistikeerde taal en volume nodig om ander te raak nie. Só gesels Mila van Niekerk, 'n gr. 11-leerder van Hoërskool Outeniqua, en vanjaar se wenner van die nasionale Poort-poësiekompetisie.
Nóg 'n kwagga, Etienne Petherbridge, het in hierdie kompetisie presteer, met 'n sewende plek onder die toptien inskrywings. Drie van Mila se gedigte gaan in Poort se bundel vervat word, tesame met gedigte van nog Kwaggas wat aan die kompetisie deelgeneem het: Emmie Wanenburg, Jurgens Jansen en Wernich Cassell. Prosa van Micke Jansen van Rensburg word by die bundel ingesluit.
In hul terugvoer oor Mila se gedig
Sonskerm verwys die sameroepers van die beoordelaarspaneel, prof. Hein Viljoen en dr. Ilse de Koker, na haar wengedig as volg: "Sonskerm is op die oog af 'n baie eenvoudige gedig, maar agter die eenvoud is daar heelwat ingewikkelde emosies en ervarings op die spel. Mila van Niekerk roep in hierdie gedig met min woorde ryk en ingewikkelde emosies op sonder om hulle eksplisiet naam te gee. Dit maak haar 'n waardige wenner van die Poortpoësiekompetisie vir 2024."
Dit is nie die eerste keer wat Mila beoordelaars van die kompetisie beïndruk nie. Sy is immers verlede jaar se wenner van die prosa-kategorie van dieselfde kompetisie.
Die Poort-kompetisie is daarop gemik om skeppende talent onder hoërskoolleerders te ontdek, aan te moedig, te waardeer en aan ’n groter gehoor bloot te stel. Dit vind al vanaf 1971 plaas.