Geloftedag word gevier

GRAAFF-REINET — Geloftedag sal dié naweek in die Adendorp-kerkgebou gevier word en veral fokus op die voorlees van die gelofte en die samesyn van geloftegangers.

Die geloftedag-feesvieringe begin op Saterdag, 16 Desember, om 10:00.

Met hierdie byeenkoms sal daar die hele dag saam gekuier word met ‘n gesellige bring-enbraai wat beplan word.

Diegene wat meer inligting verlang, kan 072 274 1340 skakel.

Waaroor gaan Geloftedag?

Op 16 Desember 1838 is 470 Voortrekkers deur duisende Zoeloes, georganiseer in verskeie ‘impi’s’, by Bloedrivier aangeval.

In die daaropvolgende oorwinning is net een Voortrekker lig beseer - hul leier, Andries Pretorius.

Op die voorafgaande paar dae het die Voortrekkers daagliks ‘n gelofte afgelê dat indien God hulle sou help, sou hulle en hulle nageslag daardie dag soos ‘n Sabbatdag herdenk, en die eer van die oorwinning sal aan God gegee word.

Die slag staan bekend as die Slag van Bloedrivier, en die dag as (oorspronklik) ‘Dingaansdag’ (genoem na die koning van die Zoeloes).

‘n Sonstraal val elke jaar op 16 Desember op die granietsenotaaf in die Voortrekkermonument.

Oorgang na Versoeningsdag

In 1994 het die eerste Anc-regering die dag met die meer politiek-korrekte Versoeningsdag vervang om versoening oor kultuur- en kleurgrense te bevorder. Afrikaners vier egter steeds geloftedag in die gees van die Gelofte.