Enkele van die oorspronklike stigterslede se nasate is tans nog steeds lede van die vereniging
MURRAYSBURG — Die lede van die Laer Sneeuberg Landbouvereniging van Murraysburg, het die 100-jarige bestaan van hul vereniging vanjaar by verskillende geleenthede gevier.
Op 10 Maart het die vereniging ‘n herdenkingsvergadering op die plaas De Vlei van Jos en Ida Cloete, gehou.
Dit was op dieselfde plaas waar ‘n aantal boere, presies 100 jaar gelede, besluit het om “De Lager Sneeuberg Boerevereniging” te stig.
By die herdenkings-vergadering is uittreksels uit die notules, en ook ander interessanthede, met die huidige lede gedeel. Die ledelyste (met plaasname) was ook beskikbaar. Die lede het dit aangevul met verdere staaltjies uit die verlede.
(Enkele van die oorspronklike stigterslede se nasate is tans nog steeds lede van die vereniging.) ‘n Mosie is ook aanvaar om erkenning te gee én hulde te bring aan al die oud-lede wat in die verlede, met baie opoffering, groot bydraes tot georganiseerde landbou gemaak het.
Die amptelike stigting van die Laer Sneeuberg Landbouvereniging het op 12 Mei 1917 plaasgevind.
By dié geleentheid is die eerste grondwet goedgekeur en ‘n bestuur verkies. Dit was ook die begin van georganiseerde landbou in Murraysburg. Kort daarna is ander landbouverenigings in die verskillende wyke gestig, en in 1919 is die Murraysburg Sentrale Boerevereniging gestig. Vandag is dit bekend as die Murraysburg Distriks Landbou-vereniging (DLV).
Tydens Murraysburg DLV se vergadering op 19 April die jaar, is ‘n feesvergadering gehou om die 100-jarige bestaan van georganiseerde landbou in Murraysburg te herdenk.
Peter Kingwill, tans die oudste aktiewe lid van Murraysburg DLV, het as geleentheidspreker opgetree.
Hy het met behulp van notules, statistieke oor reënval en produktepryse, ‘n bondige uiteensetting gegee van die wel en wee van landbou in Murraysburg oor die afgelope 100 jaar. Hierdie geleentheid is afgesluit met ‘n geselligheid saam met verteenwoordigers van die borge. Die plaaslike Vlv-tak (wat ook reeds vir 85 jaar bestaan!), het vir die heerlike ete gesorg.
By die laaste vergadering in November vanjaar, is die lede toegespreek deur Dr Chris Landman van Jansenville -‘n konsultant vir herkouervoeding.
‘n Gedenkwaardige jaar vir Laer Sneeuberg Landbouvereniging, is afgesluit met ‘n uitstappie na Graaff-reinet.
Die lede en hul gades het die houkrale van Karan Beef besoek, asook na al die interessanthede by Karoo Taksidermie gaan kyk.
Die dag is afgesluit met ‘n gesellige saam kuier by Botanies.
Die voorsitter, Kobus van Heerden, word hartlik bedank vir al die puik reëlings in hierdie spesiale feesjaar. Die lede van Murraysburg se Laer Sneeuberg Landbouvereniging: (agter) Anton van Rensburg, Roché van Heerden, Willem-schalk Pienaar, Kobus van Heerden (voorsitter), Jaco van der Berg, Josias Cloete (sekretaresse), Louis Slabbert, (voor) Roelo van Heerden, Jannie Pienaar, Kotie van der Berg en Anthonie Troskie.