Aansoek om interdik ter syde gestel
GRAAFF-REINET — Die ongeluk ry ons bloots. Ongelukvoëls. Weerlig slaan nie twee keer op dieselfde plek nie.
Dit is waarskynlik wat deur die gemoed van ses lidmate van die Pastoriestraat Congregational Kerk in Kroonvale, Graaff-reinet, gegaan het toe elk van hulle 'n aansoek om 'n interdik teen hulle ontvang het, ingedien deur die kerk se predikant.
Die Graaff-reinet Advertiser het vroeër vanjaar 'n berig geplaas oor 35 van bogenoemde kerk se lidmate wat se skorsing met koste deur die Hoogsgeregshof in Grahamstad ter syde gestel is.
Vir ses van hierdie groep was die skorsing egter nie die enigste onreg wat hulle moes betwis nie, maar moes hulle ook hierdie aansoek om 'n interdik teenstaan.
Om hul onskuld te bewys en sodoende hul naam in ere te herstel, was hulle bereid om hul saak tot in die hoogste hof te verdedig.
Op Maandag, 28 Augustus, sou die saak aangehoor word nadat dit telkemale uitgestel is.
Na konsultasie tussen die twee partye se prokureurs en daama die magistraat, is kortliks terugvoering aan die groep gegee.
Die afleiding wat hieruit gemaak kan word is dat die aansoek geen substansie gehad het nie, derhalwe is die saak summier van die hofrol geskrap.
Die ses lidmate teen wie die aansoek gebring is, het dit aanvanklik oorweeg om 'n teeneis vir naamskending teen die kerk se predikant in te dien. Na noukeurige oorweging, en in die gees van versoening is egter daarteen besluit.
Die groter groep het intussen op grond van die Hoogsgeregshofbevel weer eredienste van die kerk begin bywoon. Hul versugting dat die kerk se Sinode as fasiliteerder vir gesprekvoering tussen die verskillende partye sal optree het intussen steeds nie gerealiseer nie.
Tog hoop en bid hulle nog altyd vir 'n blywende oplossing en dat hul terugkoms in die kerk vergifnis en versoening sal aanstig eerder as verdeeldheid.
Soos die spreekwoord sê: "Die hoop beskaam nie."