Graaff-reinet 7 Trust suksesvol geloods
Die gaste met die stigting van die ‘Class of ‘76’-trustfonds het die aand terdeë geniet.
GRAAFF-REINET — Die onlangse geleentheid om die Spandau Sekondêre Skool se ‘Class of 76’-trustfonds te loods was ‘n reuse sukses en dié oudskoliere verbonde aan dié projek bedank graag almal wat dit ondersteun het.
(Die plaaslike besighede en spesifieke individue sal nog persoonlike bedankings ontvang.)
Tydens die funksie ter viering van die stigting van dié trustfonds is die gaste is deur Moira (Jooste) Christoffels verwelkom en het sy die noodsaaklikheid om die fonds te ondersteun - omrede dit vir behoeftige leerders geskep is - deur die gemeenskap en veral die skoolgemeenskap beklemtoon.
Anthony Louw het toe die doel van die fonds verduidelik en waarom dit noodsaaklik is om so ‘n fonds te ondersteun. Hy het ook die reëlingskomitee bedank vir die reëlings en hul onbaatsugtigheid.
In sy aanvaarding van die fonds het Spandau Sekondêr se skoolhoof die klas van 1976 bedank vir dié inisiatief, “dit is idees soos hierdie wat gemeenskappe en skole verander”.
In haar baie interessante toespraak het Janine Smith toe gewys op hoeveel dit huidiglik kos om ‘n student deur een jaar op universiteitsvlak te kry. Sy het aangevoer dat die taak van die fonds nie net op een persoon of klas se skouers rus nie, maar wel op die hele gemeenskap.
In sy bedanking het Daantjie Japhta almal bedank wat bygedra het tot die sukses van die aand en veral vir Jan White wat meer as twintig kaartjies verkoop het, en vir Allen en Portia Hoffman wat die skoolsaal in ‘n uitstaande venue vir die geleentheid omtower het.
Die fonds is nou geloods en die geld ter stuiwing van die fonds se koffers sal geïn word deur die hele skoolgemeenskap en oudskoliere. “Die eerste tree is nou gegee en die reis aan die gang”, het Daantjie Japhta, voorsitter van die fonds gesê.
Belangstellendes kan hom skakel by 078 061 2940 om meer hieroor uit te vind. Die skoolhoof van Spandau Sekondêre Skool, Eugene Mackelina, tydens sy toespraak.