Grond is goed en modder manjefiek

GRAAFF-REINET — Geen kleuter kan leer sonder speel nie - dit is die enigste manier hoe hulle vaardigheid of kennis so vinnig as moontlik kan baasraak.

By die WE Pienaar Pre-primêre Skool, oftewel Weppie Preppie, in Graaff-reinet, vind leer altyd speel-speel plaas.

En waar kan ’n kind so lekker speel soos in die modder?

Verlede Vrydag, 9 Januarie, het Weppie Preppie ‘n ‘modderdag’ gehou.

Die kinders, geklee in hul oudste klere of swembroeke, het die dag in heerlike groot modderplasse rondgespeel. Daar is al telkemale bewys dat sensoriese spel kinders se breintjies voed - dit leer hulle kreatief wees, versterk hulle mo- toriese vermoë, wetenskap en selfs wiskunde – en dit is juis wat met die aktiwiteit bedoel was - die modder is omtrent gevoel en geruik (en partykeer geproe). Vir elke ouderdomsgroep het die modder ‘n bekoring gehad: die kleintjies in die Oranjeklas het modderkoekies gebak terwyl die ouer leerders besig was om met dieselfde modder kastele te bou.